اسلام آباد:
وزيراعظم جي صدارت هيٺ قومي اقتصادي ڪائونسل جو اجلاس سڀاڻي 8 جون تي ٿيندو، جنهن ۾ چئني صوبن ۽ گلگت بلتستان جا وڏا وزير، وفاقي وزير ۽ آزاد ڪشمير جو وزيراعظم شرڪت ڪندو.
اقتصادي سروي 9 جون تي پيش ڪرڻ جو امڪان آهي، ناڻي واري وزارت جي ذريعن موجب ايندڙ مالي سال جي وفاقي بجيٽ جو حجم 171 کرب رپيا هوندو، معاشي ترقي جي شرح جو هدف 4.1 سيڪڙو ۽ سراسري مهانگائي جو اندازو 8.4 سيڪڙو رکيو ويو آهي.
ذريعن جو چوڻ آهي ته پيٽروليم ليوي جو هدف 1727 ارب، ٽيڪس روينيو جو هدف 15267 ارب رپيا، نان ٽيڪس 2768 ارب رپيا رکڻ جي تجويز آهي، وفاقي پي ايس ڊي پي جو حجم 11 کرب رپيا، سود جي ادائيگي لاءِ 7824 ارب، دفاع لاءِ 2665 ارب رپيا رکڻ جي تجويز ڏني وئي آهي.
ذريعن جو چوڻ آهي ته سرڪاري ملازمن جي پگهارن ۽ پينشن ۾ 7 کان 10 سيڪڙو واڌ جو امڪان آهي، اتحادي 15 سيڪڙو واڌ تي اصرار ڪري رهيا آهن، حتمي فيصلو 10 جون تي وفاقي ڪابينا جي اجلاس ۾ ڪيو ويندو.
ذريعن جو چوڻ آهي ته ايندڙ بجيٽ ۾ ڪرپٽو ٽرانزيڪشن کي ٽيڪس نيٽ ۾ آڻڻ لاءِ ڪرپٽو ٽرانزيڪشن جي منافعي تي 10 کان 30 سيڪڙو ڪيپيٽل گين ٽيڪس لاڳو ڪيو ويو آهي، اڳوڻي قبائلي علائقن لاءِ ٽيڪس ڇوٽ ختم ٿيڻ جو امڪان آهي، 220 ارب رپين جا نوان ٽيڪس لڳائڻ جي تجويز آهي.
واپارين لاءِ فڪسڊ ٽيڪس اسڪيم تحت 20 ڪروڙ رپين تائين جي سالياني سيلز وارن دڪاندارن تي هڪ سيڪڙو ٽيڪس لاڳو ڪيو ويندو ۽ ان کي آڊٽ کان ڇوٽ ڏني ويندي.
آءِ ايم ايف جي ايس ٽي 18 مان وڌائي 19 سيڪڙو ڪرڻ تي زور ڏنو آهي، ٽيڪس هدف حاصل ڪرڻ لاءِ بجيٽ ۾ اضافي قدم به شامل ڪيا ويندا.
سپر ٽيڪس ۾ 1 کان 2 سيڪڙو گهٽتائي جي تجويز، فارمولا کير، ڪيچپ، گيهه، خوردني تيل، چانهه جي پتي، کنڊ، خشڪ کير سميت درجنين کاڌي پيتي جي شين تي سيلز ٽيڪس جي وصولي لاءِ پرچون پرائس پرنٽ لازمي بڻائڻ جو فيصلو، ان لاءِ اهي شيون ٽئين شيڊول ۾ شامل ڪيون وينديون.
ضروري سامان تي ڳري ٽيڪس برقرار رکڻ جو امڪان آهي، اليڪٽرڪ گاڏين جي سي ڪي ڊي ڪِٽس تي سيلز ٽيڪس جي ڇوٽ ۽ هائبرڊ گاڏين تي رعايت ختم ٿي ويندي، جڏهن ته مقامي طور تي تيار ڪيل يا اسمبل ٿيل برقي گاڏين تي 1 سيڪڙو سيلز ٽيڪس 30 جون تائين برقرار رهندو.
قبائلي علائقن ۾ بجلي جي فراهمي، مقامي طور تي تيار ٿيندڙ سائلن تي سيلز ٽيڪس جي ڇوٽ 30 جون تي ختم ٿي ويندي.
