ڪالا هارن فلم تڪرار: سلمان خان کي عدالت مان فوري رليف نه ملي سگهيو

بالي ووڊ سپر اسٽار سلمان خان پنهنجي زندگي تي ٻڌل تڪراري فلم ”ڪالا هارن: دي بيٽ فار ليگيسي“ خلاف داخل ڪيس ۾ فوري ڪاميابي حاصل نه ڪري سگهيو. دهلي هاءِ ڪورٽ عبوري رليف ڏيڻ جي درخواست رد ڪندي ڪيس جي ٻڌڻي پهرين جولاءِ تائين ملتوي ڪري ڇڏي، ٻڌڻي دوران جسٽس مدھو جين تي مشتمل بينچ سلمان خان جي قانوني ٽيم کي هدايت ڪئي ته هو ڪيس سان لاڳاپيل سمورا دستاويز ۽ رڪارڊ فلم ٺاهيندڙن جي وڪيلن کي فراهم ڪن ته جيئن هو عدالت آڏو پنهنجو موقف مڪمل طور تيار ڪري سگهن. سلمان خان عدالت کي درخواست ڪئي آهي ته فلم جي رليز کي روڪيو وڃي ڇاڪاڻ ته هن جو چوڻ آهي ته فلم ۾ 1998 جي مشهور ڪاري هرڻ جي شڪار واري ڪيس ۽ گينگسٽر لارنس بشنوئي سان سندس مبينا تڪرار سندس اجازت کانسواءِ ڏيکاريو ويو آهي. عدالت ۾ سلمان خان جي وڪيل سنديپ سيٺي موقف اختيار ڪيو ته فلم بنيادي طور سندس مؤکل جي زندگي تي ٺاهي پئي وڃي، جڏهن ته کيس نه ته اجازت ڏني وئي ۽ نه ئي قانوني اختيار. هن چيو ته فلمساز سلمان خان جي شهرت، سڃاڻپ ۽ عوامي مقبوليت کي ڪمرشل مقصدن لاءِ استعمال ڪري رهيا آهن. وکيل وڌيڪ چيو ته جيتوڻيڪ فلم ۾ سلمان خان جو نالو سڌو سنئون استعمال نه ڪيو ويو آهي پر مکيه ڪردار، ڪهاڻي ۽ مختلف منظر واضح طور تي سندس شخصيت سان ملندڙ جلندڙ آهن. هن عدالت جو ڌيان فلم جي پروموشنل مواد ڏانهن پڻ ڪرايو، جتي فلم جو مرڪزي ڪردار نه رڳو سلمان خان جهڙو نظر اچي ٿو پر سندس مشهور فيروزي ڪنگڻ جهڙو ڪنگڻ به پائيندو آهي. سلمان خان جي ٽيم اهو به اعتراض اٿاريو ته فلم جي ٽيزر ۾ مرڪزي ڪردار کي هٿيار کڻي ڏيکاريو ويو آهي، جيڪو عوام ۾ غلط تاثر پيدا ڪري سگهي ٿو، خاص طور تي ان حقيقت جي باوجود ته سلمان خان حقيقي زندگي ۾ آرمس ايڪٽ جي الزامن مان بري ٿي چڪو آهي. ٻئي طرف فلمساز جي وڪيلن فلم جي فوري رليز جي مخالفت ڪندي دليل ڏيندي چيو ته ڪيس جا مڪمل دستاويز نه ملڻ سبب هو جامع جواب ڏيڻ جي پوزيشن ۾ نه آهن. هن عدالت کي اهو به ٻڌايو ته فلم جي موضوع جي ڪري کيس ڌمڪيون ۽ رد عمل جو سامنا آهي. عدالت ڌرين جا دليل ٻڌڻ بعد سلمان خان جي فوري رليف جي درخواست رد ڪندي ايندڙ ٻڌڻي پهرين جولاءِ تي مقرر ڪئي.



Source link