اسلام آباد:
ناڻي واري وفاقي وزير محمد اورنگزيب چيو آهي ته سعودي عرب مان حاصل ڪيل 3 ارب ڊالرن جو قرض ڪاميابي سان واپس ورتو ويو آهي، جنهن سان پاڪستان جا پرڏيهي مٽاسٽا جا ذخيرا موجوده سطح تي برقرار رهندا.
ڪالهه خميس ڏينهن سينيٽ جي ناڻي بابت اسٽينڊنگ ڪميٽي جي اجلاس کانپوءِ ميڊيا سان ڳالهائيندي ناڻي واري وزير سعودي قرض جي تجديد بابت سوال جي جواب ۾ مختصر ڳالهه ٻولهه ڪندي چيو ته سڀ ڪجهه ٺيڪ آهي، سعودي عرب هلندڙ سال اپريل ۾ پاڪستان کي ٽن مهينن لاءِ 3 ارب ڊالر جو قرض ڏنو هو ته جيئن پاڪستان گڏيل عرب امارات جو قرض واپس ڪري سگهي.
قرض هن هفتي جي شروعات ۾ پختو ٿي ويو، پر ناڻي واري وزارت طرفان گذريل هڪ هفتي تائين ان جي تجديد بابت ڪا به باضابطه وضاحت نه ڏني وئي.
محمد اورنگزيب گذريل هفتي توانائي واري وفاقي وزير سردار اويس لغاري سان گڏ سعودي عرب ويو هو، جتي ٻنهي ملڪن وچ ۾ مالي ۽ اقتصادي سهڪار سميت گڏيل دلچسپي جي معاملن تي خيالن جي ڏي وٺ ڪئي وئي.
ناڻي واري وزير جو وطن واپسي کانپوءِ سعودي قرض جي تجديد بابت هي پهريون عوامي بيان آهي. 7 ارب ڊالرن جي آءِ ايم ايف پروگرام تحت سعودي عرب، چين ۽ گڏيل عرب امارتن يقين ڏياريو هو ته اهي ايندڙ سال سيپٽمبر تائين اسٽيٽ بئنڪ آف پاڪستان ۾ 12.5 بلين ڊالرز جا ڪل ذخيرا برقرار رکندا.
بعد ۾ متحده عرب امارات پنهنجي مالي امداد واپس وٺي ڇڏي، جنهن کانپوءِ سعودي عرب پنهنجي امداد ۾ اضافو ڪري پاڪستان کي 8 ارب ڊالرن تائين پهچايو.
ذريعن موجب حڪومت پرڏيهي قرضن جي مدي ۾ واڌ ۽ چائنا پاڪستان اڪنامڪ ڪوريڊور (سي پيڪ) تحت قائم پاور پلانٽس لاءِ چيني ڪمپنين کي واجب الادا توانائي قرضن جي ادائيگين کي ختم ڪرڻ لاءِ مختلف آپشنز تي به ڪم ڪري رهي آهي.
ان دوران پاڪستان سعودي عرب کي 15 سالن لاءِ 6.7 بلين ڊالر جي ڊيفرڊ پيمينٽ آئل سهولت فراهم ڪرڻ جي به درخواست ڪئي آهي ته جيئن وچ اوڀر ۾ ڇڪتاڻ سبب توانائي جي سلامتي کي يقيني بڻائي سگهجي.
ان دوران سينيٽ جي ناڻي بابت اسٽينڊنگ ڪميٽي بينظير انڪم سپورٽ پروگرام (بي آءِ ايس پي) ۾ 1300 کان وڌيڪ خالي جاين جو معاملو به اٿاريو، جيڪو اداري جي منظور ڪيل عملي جو 38 سيڪڙو آهي.
ملاقات دوران ناڻي واري وزير محمد اورنگزيب ۽ بي آءِ ايس پي جي چيئرپرسن سينيٽر روبينا خالد ۾ ان معاملي تي اختلاف پيدا ٿيا.
ناڻي واري وزير موقف اختيار ڪيو ته معاملو غربت جي خاتمي بابت اسٽينڊنگ ڪميٽي ڏانهن موڪليو وڃي، جڏهن ته روبينا خالد چيو ته جڏهن ته ناڻي واري وزارت ڀرتين جي مخالفت ڪئي هئي، ان ڪري معاملو فنانس ڪميٽي ڏانهن آندو ويو.
روبينا خالد چيو ته 2014ع کان بي آءِ ايس پي ۾ ڪا به نئين ڀرتي نه ڪئي وئي آهي، جنهن سبب اداري جي ڪارڪردگي متاثر ٿي رهي آهي.
ٻئي طرف ناڻي واري وزير چيو ته بي آءِ ايس پي جا 838 ارب رپين جا سمورا فنڊ هلندڙ مالي سال ڊجيٽل طريقي سان ورهايا ويندا، ان ڪري نئين ڀرتين جي ضرورت ناهي پر قدرتي انتشار واري پاليسي اختيار ڪئي وڃي.
ڪميٽي نئين ڀرتين جي ضرورت جو جائزو وٺڻ لاءِ معاملو خرچن بابت ڪميٽي حوالي ڪرڻ جو فيصلو ڪيو.
اجلاس کي ٻڌايو ويو ته بي آءِ ايس پي جي منظور ٿيل تعداد لڳ ڀڳ 3486 آهي، جنهن مان هن وقت 1300 پوسٽون خالي آهن.
