اسلام آباد:
پيٽروليم واري وزير علي پرويز ملڪ سان آئل ٽينڪر ڪانٽريڪٽرز ايسوسي ايشن جي وفد ڪامياب ملاقات ڪئي، جنهن ۾ ٻنهي معاملن کي گڏيل مشاورت سان حل ڪرڻ تي اتفاق ڪيو ويو.
ايڪسپريس نيوز موجب پيٽروليم واري وزير علي پرويز ملڪ آئل ٽينڪر ٺيڪيدارن جا مسئلا حل ڪرڻ لاءِ اعليٰ سطحي ڪميٽي جوڙي ڇڏي آهي. اسپيشل سيڪريٽري پيٽروليم جي سربراهي ۾ ڪميٽي هڪ هفتي اندر سفارشون پيش ڪندي. ڪميٽي ۾ ڊي جي آئل، اوگرا، او ٽي سي ۽ او سي اي سي جا نمائندا شامل هوندا.
اوٽڪا جو وفد صدر عبيدالله آفريدي جي اڳواڻي ۾ پيٽروليم واري وزير سان ملاقات لاءِ پهتو، اوٽڪا وائيٽ آئل پائيپ لائين جي ڪوٽا ۾ گهٽتائي، فريٽ فارمولا ۽ ڪمرشل لوڊشيڊنگ بابت مطالبا پيش ڪيا.
پيٽروليم واري وزير اوگرا کي هدايت ڪئي ته آئل ٽينڪر ٺيڪيدارن جا جائز مسئلا ترجيحي بنيادن تي حل ڪيا وڃن. آئل مارڪيٽنگ ڪمپنين کي هدايت ڪئي وئي ته هو فريٽ ڪانٽريڪٽ بابت لکت ۾ پاليسي جمع ڪرائين، آئل ٽينڪرز جي موثر ٽريڪنگ اوگرا کي ڪن ۽ ڊيلرز جي گاڏين کي پرائمري ٽرانسپورٽ کان الڳ رکيو وڃي.
علي پرويز ملڪ چيو ته حڪومت جي اولين ترجيح عوام کي پيٽرول جي فراهمي کي يقيني بڻائڻ آهي، اوٽڪا پيٽروليم واري وزير جي مثبت ڪردار کي ساراهيو ۽ ڪميٽي جي قيام جي آجيان ڪئي، ڳالهين ذريعي مسئلا حل ڪرڻ تي اعتماد جو اظهار ڪيو.
