چارسده جي مشهور مذهبي شخصيت اڳوڻي صوبائي اسيمبلي ميمبر ۽ شيخ الحديث مولانا محمد ادريس ترنگزئي قاتلاڻي حملي ۾ شهيد ٿي وئي، صدر ۽ وزيراعظم پاران قتل تي افسوس جو اظهار، جاچ لاءِ 3 رڪني ڪميٽي جوڙي وئي، جي يو آءِ احتجاج جو اعلان ڪري ڇڏيو آهي.
ذريعن موجب مولانا محمد ادريس تي فائرنگ جو واقعو چارسده ضلعي جي علائقي اتمانزئي ۾ پيش آيو. واقعي ۾ ٻه پوليس اهلڪار پڻ زخمي ٿي پيا. مولانا محمد ادريس درس حديث ڏيڻ لاءِ دارالعلوم اتمانزئي وڃي رهيا هئا ته اهو واقعو پيش آيو. واقعي جو ڪيس پوليس ٿاڻي سي ٽي ڊي مردان ۾ داخل ڪيو ويو آهي.
شهيد مولانا محمد ادريس جي جنازي نماز ترنگزئي چارسده ۾ ادا ڪئي وئي، جنهن ۾ هزارين ماڻهن شرڪت ڪئي، جنهن بعد شهيد کي اباڻي قبرستان ۾ مٽيءَ ماءُ حوالي ڪيو ويو.
پوليس ذريعن موجب فائرنگ اڻڄاتل ماڻهن ڪئي، واقعي کانپوءِ کين فوري طور اسپتال نيو ويو پر هو رستي ۾ ئي فوت ٿي ويا، فائرنگ جي واقعي کانپوءِ جوابدار موقعي تان فرار ٿي ويا، جاچ ٽيمن موقعي تي موجود سيف سٽي ڪيمرائن جي مدد سان حملي آورن جون تصويرون حاصل ڪري ورتيون آهن، دهشتگردن جي ڳولا جاري آهي.
آءِ جي خيبرپختونخواهه ذوالفقار حميد جوابدارن جي فوري گرفتاري جا حڪم جاري ڪندي چيو آهي ته ملوث عنصرن کي جلد انجام تائين پهچايو ويندو.
جي يو آءِ جو اڳواڻ شيخ الحديث مولانا محمد ادريس مشهور مذهبي اسڪالر مان هڪ آهي. شهيد مولانا محمد ادريس جي يو آءِ سربراهه مولانا فضل الرحمان جي ويجهن ساٿين مان هو. پاڻ شهيد مولانا حسن جان جو فرزند هو.
جي يو آءِ پاران احتجاج جو اعلان
جمعيت علماءِ اسلام مولانا محمد ادريس جي قتل خلاف سڀاڻي سڄي ملڪ ۾ احتجاج جو اعلان ڪيو آهي. جي يو آءِ سڀاڻي سڄي صوبي ۾ احتجاج ڪندي.
قاتلن جي گرفتاري لاءِ 3 رڪني ڪميٽي جوڙي وئي آهي
مولانا ادريس شهيد جي هاءِ پروفائل قتل ڪيس جي جاچ لاءِ 3 رڪني پراسيڪيوشن ٽيم جوڙي وئي آهي.
ڊسٽرڪٽ پبلڪ پراسيڪيوٽر چارسده جي پڌرائي موجب ڪلر محمد ادريس شهيد جي ڪيس جي جاچ ٽيم ۾ سينيئر پبلڪ پراسيڪيوٽر محمد ارشاد، لا آفيسر سڪندر زمان ۽ اسسٽنٽ پبلڪ پراسيڪيوٽر شاهد عادل شامل آهن.
بيان موجب پراسيڪيوشن ٽيم پوليس اسٽيشن سي ٽي ڊي مردان ۾ داخل ايف آءِ آر نمبر 36 تحت ڪيس جي جاچ جي نگراني ڪندي.
نوٽيفڪيشن ۾ ميمبرن کي هدايت ڪئي وئي ته هو پوليس جي جاچ ٽيمن سان مڪمل رابطا برقرار رکن ۽ ڪيس جي پيش رفت رپورٽ روزاني جي بنياد تي آفيس ۾ جمع ڪرائين.
پراسيڪيوشن موجب هن ٽيم جوڙڻ جو مقصد مولانا محمد ادريس شهيد قتل ڪيس جي شفاف ۽ قانوني پيروي کي يقيني بڻائڻ آهي.
خيبرپختونخواهه اسيمبلي ۾ مذمتي ٺهراءُ جمع ڪرايو ويو
خيبرپختونخواهه اسيمبلي ۾ ممتاز مذهبي اسڪالر شيخ الحديث مولانا محمد ادريس جي قتل خلاف گڏيل مذمتي ٺهراءُ جمع ڪرايو ويو. ٺهراءُ جي يو آءِ سان تعلق رکندڙ اسيمبلي ميمبرن جمع ڪرايو. قرارداد ۾ شيخ الحديث مولانا محمد ادريس جي قتل جي سخت مذمت ڪندي مطالبو ڪيو ويو ته قتل ۾ ملوث جوابدارن کي جلد گرفتار ڪري قانون موجب سزا ڏني وڃي. قرارداد ۾ مطالبو ڪيو ويو ته اهڙن واقعن کي روڪڻ لاءِ قدم کنيا وڃن.
صدر ۽ وزيراعظم پاران افسوس جو اظهار
صدر آصف علي زرداري ۽ وزيراعظم شهباز شريف چارسده ۾ مولانا محمد ادريس ترنگزئي جي شهادت تي گهري ڏک ۽ افسوس جو اظهار ڪيو آهي.
ايوان صدر مان جاري ڪيل بيان ۾ صدر چيو ته اهڙن بزدلاڻن آپگهاتي حملن سان قوم جو حوصلو پست نه ٿو ڪري سگهجي، وطن عزیز مان دهشتگردي جي مڪمل خاتمي لاءِ قومي عزم مضبوط ۽ غير متزلزل آهي.
آصف علي زرداري چيو ته دهشتگرد عناصرن خلاف بلاامتیاز ڪارروايون جاري رهنديون، ملڪ کي امن جو گانو بڻايو ويندو، هن شهيدن جي خاندانن سان دلي تعزيت ۽ همدردي جو اظهار ڪندي الله تعاليٰ کان درجات جي بلندي ۽ سوگوار پونئرن لاءِ صبر جي دعا ڪئي، صدر واقعي ۾ زخمي ٿيل پوليس اهلڪارن جي جلد صحتيابي لاءِ نيڪ تمنائن جو اظهار ڪيو.
وزيراعظم شهباز شريف به مولانا محمد ادريس جي شهادت تي گهري ڏک ۽ افسوس جو اظهار ڪيو آهي. هن شهيدن جي پونئرن سان دلي همدردي ۽ تعزيت جو اظهار ڪندي شهيدن جي پونئرن لاءِ صبر جميل جي دعا ڪئي. وزيراعظم واقعي ۾ زخمي ٿيل پوليس اهلڪارن جي جلد صحتيابي لاءِ به دعا ڪئي آهي.
خيبرپختونخواهه جي گورنر ۽ وڏي وزير مولانا ادريس تي قاتلاڻي حملي جي مذمت ڪئي آهي
خيبرپختونخواهه جي گورنر فيصل ڪريم ڪنڊي ۽ وڏي وزير سهيل آفريدي قاتلاڻي حملي ۾ مولانا ادريس جي شهادت تي گهري ڏک ۽ افسوس جو اظهار ڪندي پوليس جي اعليٰ اختيارين کان رپورٽ طلب ڪري ورتي آهي.
فيصل ڪريم ڪنڊي شيخ الحديث مولانا ادريس جي شهادت کي ملڪ جو ناقابل تلافي نقصان قرار ڏيندي چيو ته شهيد جي زندگي دين ۽ امن جي تبليغ ۾ گذري. مولانا جي شهادت رائيگان نه ويندي، قاتلن کي سزا ملندي.
خيبرپختونخواهه جي وڏي وزير سهيل آفريدي پنهنجي بيان ۾ چيو ته مولانا محمد ادريس جي شهادت افسوسناڪ آهي.
مولانا ادريس جي شهادت تي پنهنجي بيان ۾ امير جماعت اسلامي حافظ نعيم الرحمان چيو ته مولانا محمد ادريس هڪ باوقار شخصيت هو. سندس ديني، علمي، سياسي ۽ سماجي خدمتون هميشه ياد رکيون وينديون.
اڳوڻي امير جماعت اسلامي سراج الحق به واقعي جي سخت لفظن ۾ مذمت ڪندي ان دل ڏکوئيندڙ سانحي تي سوڳوار خاندان ۽ سمورن سوگوار پونئرن سان دلي تعزيت ۽ همدردي جو اظهار ڪيو آهي.
سراج الحق چيو ته خيبرپختونخواهه ۾ امن امان جي بگڙيل صورتحال ڳڻتي جوڳي آهي. شهرين جي جان ۽ مال جي حفاظت کي يقيني بڻائڻ صوبائي حڪومت جي ذميواري آهي پر مسلسل اهڙا واقعا پيش اچڻ حڪومتي ڪارڪردگي تي سواليه نشان آهن.
