روس هڪ ڀيرو ٻيهر ايران ۽ آمريڪا وچ ۾ جاري ڇڪتاڻ ۾ ثالث جي حيثيت سان پاڪستان جي ڪردار جي حمايت جو اعلان ڪيو آهي.
اسلام آباد ۾ پريس ڪانفرنس ڪندي پاڪستان ۾ روس جي سفير البرٽ خوريوف چيو ته روس آمريڪا ۽ ايران وچ ۾ تڪرار جي پرامن حل لاءِ پاڪستان جي سفارتي ڪوششن کي مثبت سمجهي ٿو.
روسي سفير چيو ته ماسڪو انهن سمورن قدمن جي حمايت ڪندو جنهن سان واشنگٽن ۽ تهران جا خدشا ختم ڪرڻ ۽ خطي ۾ ڇڪتاڻ گهٽائڻ ۾ مدد ملندي.
هن ان ڳالهه تي زور ڏنو ته روس خطي ۾ امن ۽ استحڪام چاهي ٿو ۽ ڳالهين ذريعي مسئلن جي حل کي ترجيح ڏئي ٿو.
پريس ڪانفرنس دوران روسي سفير پاڪستاني ميڊيا جي انهن خبرن تي به رد عمل ظاهر ڪيو جنهن ۾ روس طرفان پاڪستان ۾ مبينا ڀرتين جو ذڪر ڪيو ويو هو.
هن چيو ته انهن خبرن جي تصديق نه ٿي سگهي آهي ڇاڪاڻ ته ميڊيا رپورٽن ۾ تضاد آهي. سندس چوڻ هو ته جنهن شخص جي ڀرتي جون خبرون سامهون آيون آهن، ان روسي سفارتخاني ۾ ويزا لاءِ به درخواست نه ڏني هئي.
روسي سفير چيو ته پاڪستان جا لاڳاپيل ادارا معاملي جي جاچ ڪري رهيا آهن، اميد آهي ته جلد حقيقتون سامهون اچي وينديون.
هن يوڪرين جنگ تي به ڳالهايو ۽ چيو ته يوڪرين جي نقصان تي پاڪستاني ميڊيا ۾ گهڻو بحث ٿيندو آهي جڏهن ته روس جي نقصان تي گهٽ ڳالهايو ويندو آهي.
البرٽ خوريوف چيو ته روس يوڪرين جنگ ۾ پنهنجا مقصد حاصل ڪندو ۽ ماسڪو ڪنهن به قسم جي صورتحال لاءِ تيار آهي.
