ڀارتي اداڪار رونيت راءِ به سائبر فراڊ جو شڪار آهي، مداحن کي خبردار ڪيو آهي

ڀارتي اداڪار رونيت راءِ سائبر فراڊ جو تازو ئي شڪار بڻجي ويو آهي، جنهن ۾ ماڻهن کي مبينا طور سندس سڃاڻپ استعمال ڪندي نشانو بڻايو پيو وڃي. ان صورتحال تي فوري طور تي رد عمل ظاهر ڪندي اداڪار پنهنجي مداحن کي خبردار ڪيو آهي ته هو اهڙن فراڊ عناصر کان هوشيار رهن. رونٽ راءِ سوشل ميڊيا تي انڪشاف ڪيو ته ڪو سندس نالو استعمال ڪري عورتن سان رابطو ڪري انهن کان پئسا گهرندو هو. اداڪار موجب هي جعلي شخص نه رڳو مالي فائدو حاصل ڪرڻ جي ڪوشش ڪري رهيو آهي پر ان جي نالي تي جعلي بکنگ ۽ اپائنٽمينٽ پڻ ڪرائي رهيو آهي. اداڪار پنهنجي پوسٽ ۾ واضح ڪيو ته هو سوشل ميڊيا يا ڪنهن پليٽ فارم ذريعي پئسي يا ڪنهن مالي فائدي لاءِ ڪڏهن به ذاتي طور تي ڪنهن سان رابطو نه ڪندو آهي. هن وڌيڪ چيو ته هن يا سندس ڪنهن نمائندي طرفان اهڙي ڪا به آڇ نه هئي. پنهنجي دعويٰ کي ثابت ڪرڻ لاءِ، رونيت راءِ مبينا فراڊ جا اسڪرين شاٽ به شيئر ڪيا، جنهن ۾ سندس نالو استعمال ڪندي جعلي اڪائونٽ مان رقم طلب ڪئي پئي وڃي. هن مداحن تي زور ڀريو ته جيڪڏهن انهن کي اهڙو ڪو به شڪي پيغام ملي ته فوري طور تي لاڳاپيل شخصيتن کي ٻڌايو وڃي. اداڪار خبردار ڪيو ته مشهور شخصيتن جي سڃاڻپ جو غلط استعمال هڪ وڌندڙ رجحان آهي، ان ڪري عوام کي انتهائي محتاط رهڻ جي ضرورت آهي. سندس اپيل کي سوشل ميڊيا تي ڀرپور موٽ ملي آهي ۽ مداحن ان قدم کي آگاهي پکيڙڻ جي هڪ مثبت ڪوشش قرار ڏنو آهي.



Source link