تهران: ايران جي اڳوڻي سپريم ليڊر شهيد علي خامنه اي جي ورسي ۾ سندس ٽن پٽن مسعود خامنه اي، ميثم خامنه اي ۽ مصطفيٰ خامنه اي شرڪت ڪئي جڏهن ته سندس پٽ ۽ جانشين مجتبي خامنه اي سيڪيورٽي خدشن سبب تقريب ۾ شرڪت نه ڪئي.
عالمي ميڊيا رپورٽن موجب تهران ۾ ادا ڪيل جنازي نماز ۾ لکين ماڻهن شرڪت ڪئي، جنهن ۾ ايراني عوام، اعليٰ حڪومتي شخصيتون، مذهبي اڳواڻ ۽ مختلف ملڪن جا نمائندا پڻ موجود هئا.
رپورٽن مطابق خامنه اي جي پٽن مسعود، ميثم ۽ مصطفيٰ کي جنازي نماز ۾ ٻين سوگوارن سان گڏ ڏٺو ويو، جڏهن ته ايران جي پاسداران انقلاب جي قائم مقام سربراهه برگيڊيئر جنرل احمد وحيدي به تقريب ۾ شرڪت ڪئي.
ذريعن موجب مجتبيٰ خامنه اي تقريب ۾ شرڪت نه ڪئي ڇاڪاڻ ته سندس سيڪيورٽي جا سخت خدشا هئا.
ايراني اختيارين سرڪاري تفصيل جاري نه ڪيا آهن، پر ميڊيا رپورٽون پيش ڪن ٿيون ته هن جي عوامي موجودگي کي ممڪن خطرن جي ڪري محدود ڪيو ويو آهي.
ايران ۾ علي خامنه اي جي جنازي ۽ تدفين جون تقريبون ڪيترن ئي ڏينهن تائين جاري رهڻ جو امڪان آهي. مختلف شهرن ۾ تعزيتي گڏجاڻيون ۽ دعائون پڻ منعقد ڪيون پيون وڃن، جن ۾ لکين ماڻهن جي شرڪت جو امڪان آهي.
سياسي مبصرن موجب ان موقعي تي پرڏيهي وفدن جي موجودگي ۽ ايراني قيادت جي شرڪت کي خطي جي موجوده سياسي صورتحال جي تناظر ۾ اهم قرار ڏنو پيو وڃي.
