اسلام آباد:
پاڪستان جي برآمداتي ڪارڪردگي ايندڙ مالي سال ۾ نئون رڪارڊ قائم ڪري سگهي ٿي، ملڪ جي برآمدات رڪارڊ سطح تي پهچڻ جو امڪان آهي.
هڪ خانگي ٽي وي جي رپورٽ موجب انٽرنيشنل مانيٽري فنڊ جي اندازن موجب مالي سال 27-2026ع دوران پرڏيهي واپار ۾ نمايان بهتري نظر اچي سگهي ٿي، جيڪا پهرين جولاءِ کان شروع ٿيندي.
آءِ ايم ايف پاران جاري ڪيل اندازي موجب ايندڙ مالي سال ۾ پاڪستان جي برآمدات 35 ارب 63 ڪروڙ ڊالرن تائين وڌي سگهي ٿي، جيڪا ملڪي تاريخ جي بلند ترين سطح هوندي. رپورٽ ۾ درآمدات ۽ واپاري خساري ۾ واڌ جو به امڪان ظاهر ڪيو ويو آهي.
عالمي مالياتي اداري جي انگن اکرن موجب 26-2025ع جي آخر ۾ پاڪستان جي ڪل برآمدات 31 ارب 93 ڪروڙ ڊالرن جي لڳ ڀڳ ٿيڻ جو امڪان آهي، جڏهن ته ايندڙ مالي سال ۾ ان مقدار ۾ نمايان اضافو ٿيڻ جو امڪان آهي، جنهن جي نتيجي ۾ برآمدات ۾ ڪيترائي ارب ڊالرن جو اضافو ٿي سگهي ٿو ۽ هڪ نئين رڪارڊ سطح حاصل ڪري سگهي ٿي.
اها اڳڪٿي هڪ اهڙي وقت ۾ آئي آهي جڏهن پاڪستان پنهنجي ايڪسپورٽ بنياد کي وڌائڻ ۽ پرڏيهي مارڪيٽن تائين پهچ وڌائڻ جي ڪوشش ۾ مصروف آهي.
آءِ ايم ايف جي اندازن مان ظاهر آهي ته ايندڙ مالي سال ۾ ملڪ جون واپاري سرگرميون وڌيڪ تيز ٿي سگهن ٿيون ۽ برآمدي شعبو معيشت ۾ اهم ڪردار ادا ڪري سگهي ٿو.
