تهران: ايران جي صحت واري وزارت دعويٰ ڪئي آهي ته 22 جون کان آمريڪا سان گڏجي فوجي آپريشن شروع ٿيڻ کان پوءِ سڄي ملڪ ۾ گهٽ ۾ گهٽ 38 ڄڻا مارجي ويا ۽ 400 کان وڌيڪ زخمي ٿي پيا آهن.
ايران جي صحت واري وزارت جي ترجمان حسين ڪرمان پور سوشل ميڊيا پليٽ فارم ايڪس تي جاري ڪيل بيان ۾ چيو آهي ته آمريڪي حملن جي نتيجي ۾ زخمين جو انگ 400 کان وڌي ويو آهي، جڏهن ته 38 ايراني شهري پنهنجي جان وڃائي ويٺا آهن.
هن چيو ته زخمين ۾ 22 عورتون به شامل آهن، جڏهن ته مارجي ويلن ۾ 3 عورتون به شامل آهن.
صحت واري وزارت موجب مارجي ويلن ۾ ننڍڙا ٻار به شامل آهن. بيان ۾ چيو ويو آهي ته 18 سالن کان گهٽ عمر جا 9 ٻار زخمي ٿيا، جڏهن ته حملن ۾ هڪ نابالغ مارجي ويو.
ايراني اختيارين آمريڪي حملن کي شهري آبادي لاءِ سنگين خطرو قرار ڏيندي عالمي برادري کي صورتحال جو نوٽيس وٺڻ جو مطالبو ڪيو آهي.
ٻئي طرف آمريڪي اختيارين طرفان ايران جي انهن انگن اکرن يا دعوائن تي فوري طور تي ڪو به تبصرو ناهي ڪيو ويو، جڏهن ته آزاد ذريعن کان انهن انگن اکرن جي اڃا تائين تصديق ناهي ٿي سگهي.
اهي انگ اکر هڪ اهڙي وقت سامهون آيا آهن جڏهن آمريڪا ۽ ايران وچ ۾ فوجي ڇڪتاڻ جاري آهي، ٻئي ملڪ روزاني بنيادن تي هڪ ٻئي خلاف حملن ۽ جوابي ڪارروائين جي دعويٰ ڪندا رهيا آهن.
