ايران جي پرڏيهي وزير عباس عراقچي چيو آهي ته ايران جي مسئلي جو ڪو به فوجي حل ناهي پر جيڪڏهن ملڪ تي جنگ مسلط ڪئي وئي ته ايران پنهنجي دفاع لاءِ پوري طاقت سان وڙهڻ لاءِ تيار آهي.
نئين دهلي ۾ برڪس پرڏيهي وزيرن جي اجلاس کي خطاب ڪندي عباس عراقچي چيو ته ايران جنگ نه ٿو چاهي پر سفارتڪاري، ڳالهين ۽ علائقائي استحڪام جي فروغ تي يقين رکي ٿو. هن چيو ته تهران هميشه سياسي ۽ سفارتي حل کي ترجيح ڏني آهي.
ايراني پرڏيهي وزير برڪس ملڪن ۽ عالمي برادري تي زور ڏنو ته هو آمريڪا ۽ اسرائيل جي ايران خلاف ”غير قانوني جارحيت“ جي کليل لفظن ۾ مذمت ڪن. هن چيو ته خطي ۾ وڌندڙ ڇڪتاڻ عالمي امن ۽ معيشت ٻنهي لاءِ خطرناڪ ثابت ٿي سگهي ٿي.
عباس عراقچي آبنائے هرمز جي حوالي سان به هڪ اهم بيان ڏيندي چيو ته ايران جي نقطه نظر کان هي اهم سامونڊي رستو سڀني تجارتي جهازن لاءِ کليل آهي، پر خطي ۾ سلامتي ۽ استحڪام کي برقرار رکڻ لاءِ جهازن کي ايراني بحري فوج سان تعاون ڪرڻ گهرجي.
هن وڌيڪ چيو ته ايراني قوم پرامن آهي ۽ جنگ نه ٿي چاهي پر جيڪڏهن ايران جي قومي مفادن يا خودمختياري کي خطرو ٿيو ته سخت جواب ڏنو ويندو.
تجزيه نگارن موجب ايران طرفان اهو بيان اهڙي وقت سامهون آيو آهي جڏهن وچ اوڀر ۾ آمريڪا، اسرائيل ۽ ايران وچ ۾ ڇڪتاڻ برقرار آهي، جڏهن ته آبنائے هرمز جي صورتحال عالمي ڌيان جو مرڪز بڻيل آهي.
