آمريڪي صدر ڊونلڊ ٽرمپ هڪ ڀيرو ٻيهر ايران کي سخت ڌمڪي ڏيندي چيو آهي ته جيڪڏهن تهران آمريڪا سان معاهدو نه ڪيو ته مڪمل طور تي تباهه ٿي ويندو.
هڪ تازي انٽرويو ۾ صدر ٽرمپ چيو ته کيس اميد آهي ته ايران سندس بيان کي ڏسي رهيو آهي.
هن دعويٰ ڪئي ته آمريڪا ڄاڻي ٿو ته ايران ڪجهه انڊر گرائونڊ ميزائل سسٽم کي فعال ڪيو آهي پر آمريڪي فوج انهن سمورن هدفن کي صرف هڪ ڏينهن ۾ تباهه ڪرڻ جي صلاحيت رکي ٿي.
ٽرمپ ايران جي ايٽمي پروگرام ۽ افزودگي يورينيم جي معاملي تي به ڳالهه ٻولهه ڪئي. هڪ سوال جي جواب ۾ هن چيو ته هو ايران جي سرزمين تان افزوده ڪيل يورينيم واپس وٺڻ ضروري نٿو سمجهي، جيستائين ان کي عوامي رابطن يا سفارتي نقطه نظر کان نه ڏٺو وڃي.
آمريڪي صدر جي اهڙي بيان کانپوءِ عالمي ڌيان هڪ ڀيرو ٻيهر وچ اوڀر ۾ وڌندڙ ڇڪتاڻ ۽ ايران آمريڪا لاڳاپن تي مرکوز ٿي ويو آهي.
تجزيه نگارن موجب تازا بيان ظاهر ڪن ٿا ته واشنگٽن ايران تي وڌيڪ دٻاءُ وڌائڻ جي حڪمت عملي اختيار ڪري رهيو آهي.
ٻئي طرف اڳوڻي آمريڪي صدر بارڪ اوباما به گذريل ڏينهن ٽرمپ کي تنقيد جو نشانو بڻائيندي چيو ته هن ايران جي معاملي کي پنهنجي دور ۾ ڪنهن به جنگ يا ميزائل حملي کانسواءِ سفارتي طريقي سان حل ڪيو.
ماهرن جو چوڻ آهي ته ايران ۽ آمريڪا وچ ۾ جاري ڇڪتاڻ جا نه رڳو خطي پر عالمي معيشت، تيل جي قيمتن ۽ وچ اوڀر جي سلامتي تي به گهرا اثر پئجي سگهن ٿا.
