پاڪستان ٽينس فيڊريشن ايشيا انڊر 12 ٽيم مقابلن سان گڏ ايشيا ريجنل ڪواليفائنگ ايونٽ لاءِ پاڪستان بوائز ۽ گرلز اسڪواڊ جو اعلان ڪري ڇڏيو آهي.
تفصيل موجب هي ايونٽ 11 کان 18 اپريل 2026 تائين نيپال جي شهر کٽمنڊو ۾ منعقد ٿيندو.
ان سلسلي ۾ قومي ٽيم جي چونڊ لاءِ ٽرائل 9 کان 11 مارچ 2026 تائين پاڪستان ٽينس فيڊريشن ٽينس ڪمپليڪس اسلام آباد ۾ منعقد ڪيا ويا.
قومي رينڪنگ ۽ تازي ڪارڪردگيءَ جي بنياد تي اٺ ڇوڪرن ۽ پنج ڇوڪرين کي ٽرائل ۾ شامل ڪيو ويو.
بوائز ٽيم ۾ محمد ايان، محمد فيضان ۽ مصطفيٰ عزير رانا کي چونڊيو ويو آهي جڏهن ته ايم ابراهيم حسين گل کي ريزرو رانديگر طور شامل ڪيو ويو آهي.
اهڙي طرح گرلز ٽيم ۾ شهنور عمر، شاهين عمر ۽ وجيهه فاطمه کي جاءِ ڏني وئي آهي جڏهن ته دعا يوسف قريشي کي ريزرو رانديگر رکيو ويو آهي.
پاڪستان ٽينس فيڊريشن جي صدر ۽ سيڪريٽري جنرل چونڊيل رانديگرن کي مبارڪباد ڏني ۽ کين ايندڙ ايونٽ ۾ بهترين ڪارڪردگيءَ ۽ مستقبل ۾ ڪاميابي لاءِ نيڪ خواهشن جو اظهار ڪيو.
