لنڊن: برطانوي وزيراعظم سر ڪيئر اسٽارمر هائوس آف لارڊز جي نون ميمبرن جي نالن جو اعلان ڪري ڇڏيو آهي، جنهن ۾ لنڊن جي 3 ڀيرا ميئر رهندڙ صادق خان جو نالو به شامل آهي.
برطانوي حڪومت طرفان جاري ڪيل بيان موجب وزيراعظم جي سفارش تي بادشاهه چارلس III نئين عهديدارن کي لائف پير بڻائڻ جي منظوري ڏيڻ تي رضامندي ظاهر ڪئي آهي.
ان فيصلي کانپوءِ صادق خان برطانيا جي اپر ايوان هائوس آف لارڊز جو ميمبر بڻجي ويندو، جتي کيس قانون سازي، قومي پاليسين ۽ اهم عوامي مسئلن تي بحث ۾ حصو وٺڻ جو اختيار هوندو.
صادق خان هڪ مشهور سياستدان آهي جيڪو مسلسل ٽي ڀيرا لنڊن جو ميئر چونڊيو ويو آهي. هو برطانوي سياست ۾ پاڪستاني نسل جي مسلمان اڳواڻ جي حيثيت سان اهم حيثيت رکي ٿو ۽ ان کان اڳ نائيٽ جو اعزاز به حاصل ڪري چڪو آهي.
ڊائوننگ اسٽريٽ جي مطابق، نئين نامزدگين جو مقصد قومي سطح تي انهن ماڻهن کي عزت ڏيڻ آهي جن مختلف شعبن ۾ شاندار ڪم ڪيو آهي.
هائوس آف لارڊز هن وقت اٽڪل 774 ميمبرن تي مشتمل آهي ۽ دنيا جي سڀ کان وڏي قانون ساز چيمبر مان هڪ سمجهيو ويندو آهي. اپر هائوس برطانوي پارليامينٽ جو مکيه حصو آهي، جتي قانون سازي جو جائزو ورتو ويندو آهي ۽ مختلف قومي معاملن تي بحث ڪيو ويندو آهي.
سياسي مبصرن موجب صادق خان جي لاڏاڻي نه رڳو سندس سياسي ڪيريئر جو هڪ اهم سنگ ميل آهي پر برطانيا ۾ رهندڙ پاڪستاني برادري لاءِ پڻ هڪ اهم اعزاز آهي.
