ڪراچي:
شهر قائد جي علائقي سعود آباد ۾ اڻڄاتل هٿياربندن فائرنگ ڪري هڪ شادي شده جوڙي کي قتل ڪري ڇڏيو. واقعي جي سي سي ٽي وي فوٽيج به سامهون اچي وئي آهي جنهن ۾ حملي آورن جي ڪارروائي ڏسي سگهجي ٿي.
پوليس موجب واقعو ملير جي آر سي ڊي گرائونڊ ويجهو نادرا ۽ پاسپورٽ آفيس جي سامهون پيش آيو، جتي سفيد ڪار ۾ سوار ٻن هٿياربندن موٽرسائيڪل سوار جوڙي کي نشانو بڻايو.
سي سي ٽي وي فوٽيج ۾ ڏسي سگهجي ٿو ته موٽرسائيڪل سوار جوابدار ڪار جو تعاقب ڪندي آيو ۽ جيئن ئي سعود آباد پاسپورٽ آفيس جي ويجهو پهتو ته پويان ويٺل جوابدار هلندڙ موٽرسائيڪل مان ڪار تي فائرنگ ڪري ڏني.
فائرنگ کانپوءِ ٻئي حملي آور موقعي تان بليڪ بورڊ طرف فرار ٿي ويا. فوٽيج ۾ اهو به ڏٺو ويو ته فائرنگ جي فوري بعد ڊرائيور جي سيٽ جي ڀرسان ويٺل هڪ شخص خوف وچان ڪار مان ٻاهر نڪري ويو ۽ ائين ئي فرار ٿي ويو جڏهن واقعي واري هنڌ ماڻهن جو ميڙ گڏ ٿي ويو.
پوليس موجب فائرنگ جي نتيجي ۾ مڙس ۽ زال موقعي تي ئي فوت ٿي ويا. ابتدائي جاچ ۾ انڪشاف ٿيو آهي ته فوت ٿيل جوڙي جي شادي سهولت جي بنياد تي ڪئي وئي هئي ۽ عدالت پاران سيڪشن 63 سي آر پي سي تحت تحفظ پڻ حاصل ڪيو ويو آهي.
واقعي کانپوءِ پوليس مختلف رخن کان جاچ شروع ڪري ڇڏي آهي، جڏهن ته سي سي ٽي وي فوٽيجز جي مدد سان جوابدارن جي سڃاڻپ ۽ گرفتاري لاءِ ڪارروائي ڪئي پئي وڃي.
