پاڪستاني شوبز انڊسٽري جي سينيئر اداڪار جاويد شيخ پنهنجي ڪيريئر جي مشڪل دور بابت ڳالهائيندي انڪشاف ڪيو آهي ته فلاپ فلم کانپوءِ کيس نئين فلم مان ڪڍي ڇڏيو ويو ۽ اداڪار فيصل رحمان کي ڪاسٽ ڪيو ويو.
واسع چوڌري جي پروگرام ۾ ڳالهائيندي جاويد شيخ چيو ته هو نئين فلم ۾ ڪم ڪرڻ لاءِ مڪمل تيار هو پر فلمساز کيس فون ڪري ٻڌايو ته ڊسٽري بيوٽر کيس فلاپ اداڪار سمجهي ٿو، ان ڪري ان جي بدران فيصل رحمان کي چونڊيو ويو.
جاويد شيخ جو چوڻ هو ته اهو ٻڌي کيس ڏاڍو ڏک ٿيو ۽ روئڻ لڳو. ان واقعي کان پوءِ کيس ڪجهه سالن تائين جدوجهد ڪرڻي پئي، پر بعد ۾ هو وري ڪاميابيءَ جي بلندين تي پهچي ويو.
اداڪار وڌيڪ چيو ته بعد ۾ ساڳئي فلمساز کيس ٻيهر فلم جي آڇ ڪئي پر هن دل ۾ ڪا به رنجش نه رکي ۽ اها آڇ قبول ڪئي.
جاويد شيخ چيو ته زندگي ۾ ڏکيا وقت ايندا آهن پر محنت ۽ حوصلي سان ڪاميابي ٻيهر حاصل ڪري سگهجي ٿي.
