ميڊرڊ، اسپين:
فيفا ورلڊ ڪپ 2026 جي سنسني خیز فائنل ۾ ارجنٽائن کي اضافي وقت ۾ 1-0 تان شڪست ڏئي ٻيو ڀيرو عالمي چيمپيئن بڻجندڙ اسپينش ٽيم اڄ وطن واپس پهچندي، جتي سندس استقبال لاءِ سڄو ملڪ جشن ۾ آهي.
106 هين منٽ ۾ فيران ٽورس جو فيصلو ڪندڙ گول اسپين کي تاريخي فتح ڏياري، ميڊرڊ جي گهٽين کي ڳاڙهي ۽ پيلي جهنڊن سان سجايو ويو، لکين مداح پنهنجن هيروز جي هڪ جهلڪ ڏسڻ لاءِ بيتاب هئا.
حڪومت فوري طور تي ٽيم جي استقبال لاءِ شيڊول جاري ڪري ڇڏيو آهي، جنهن موجب اسپين جي ٽيم سومر جي منجهند تي ميڊرڊ جي ايڊولفو سواريز باراجاس ايئرپورٽ تي پهچندي.
ٿوري آرام کانپوءِ رانديگرن، ڪوچنگ اسٽاف ۽ فيڊريشن جا عملدار بادشاهه فلپ ڇهين ۽ شاهي خاندان سان زرزيويلا جي شاهي محل ۾ خصوصي ملاقات ڪندا، جتي عالمي چيمپيئن کي تاريخي ڪاميابي تي مبارڪباد ڏني ويندي.
ان کانپوءِ ٽيم وزيراعظم پيڊرو سينچز جي دعوت تي مونڪولا پيلس ويندي، جتي حڪومت عالمي فاتحن جي اعزاز ۾ خصوصي استقباليه پڻ ڏيندي.
سرڪاري تقريب کان پوء، حقيقي جشن شروع ٿيندو جڏهن اسپين ٽيم ميڊرڊ جي مکيه رستن مان هڪ خاص اوپن ٽاپ بس ۾ ورلڊ ڪپ ٽرافي سان سفر ڪندي.
لکين مداح پنهنجي قومي ٽيم کي روڊن جي ٻنهي پاسن تي ڀليڪار ڪندا جيئن جلوس شهر جي مکيه نشانن مان گذرندو، جنهن ۾ ڪالي پرنسسا، البرٽو اگويليرا ۽ پلازا ڊي ڪولن شامل آهن.
آفيسرن موجب هي تاريخي فتح جو جشن پلازه ڊي سيبلز ۾ پنهنجي پڄاڻي تي پهچندو، جتي اسپين جا عالمي چيمپيئن رانديگر شاندار اسٽيج تي هزارين نه پر لکين مداحن جي سامهون ورلڊ ڪپ جي ٽرافي بلند ڪندا.
ميڊرڊ ۾ ٿيندڙ تقريب کي اسپين جي فٽبال جي تاريخ جو سڀ کان وڏو جشن قرار ڏنو پيو وڃي، جتي نئين عالمي فٽبال چيمپيئن جو شاندار استقبال ڪيو ويندو.
