وائيٽ هائوس تصديق ڪئي آهي ته آمريڪي نائب صدر جي ڊي وينس اڄ ڳالهين لاءِ پاڪستان نه ويندو. ان کان اڳ آمريڪي ميڊيا رپورٽن ۾ دعويٰ ڪئي هئي ته نائب صدر جو پاڪستان جو دورو ايران طرفان واضح جواب نه ملڻ سبب ملتوي ڪيو ويو آهي. بهرحال، آمريڪي عملدارن هاڻي واضح ڪيو آهي ته دورو منسوخ ٿيڻ بدران عارضي طور تي ملتوي ڪيو ويو آهي ۽ ڪنهن به وقت ٻيهر شيڊول ڪري سگهجي ٿو. معاملي کان واقف آمريڪي عملدارن موجب واشنگٽن سان سفارتي رابطا جاري آهن ۽ مناسب اڳڀرائي ٿيڻ جي صورت ۾ دوري جي نئين تاريخ جو اعلان ڪيو ويندو. ٻئي طرف ايران به آمريڪا سان ممڪن ڳالهين جي حوالي سان محتاط رويو اختيار ڪيو آهي. هڪ ايراني نيوز چينل سان ڳالهائيندي ايراني پرڏيهي وزارت جي ترجمان اسماعيل بقائي چيو ته اسلام آباد ۾ ڳالهين لاءِ وفد موڪلڻ بابت اڃا تائين ڪو حتمي فيصلو ناهي ڪيو ويو. هن چيو ته ايران ڳالهين ۾ ان صورت ۾ ئي شرڪت ڪندو جڏهن ان کي يقين آهي ته ڳالهيون ڪامياب ٿي سگهن ٿيون، ٻي صورت ۾ اهڙا قدم وقت جو ضايع هوندا. ياد رهي ته پاڪستان گذريل ڪجهه ڏينهن کان آمريڪا ۽ ايران وچ ۾ ممڪنه ڳالهين لاءِ اهم ثالث جو ڪردار ادا ڪري رهيو آهي پر ٻنهي طرفن جي غير يقيني بيانن کانپوءِ ان عمل ۾ دير جو امڪان وڌي ويو آهي. آمريڪي صدر ٽرمپ پاڪستان جي درخواست تي جنگ بندي ۾ واڌ جو اعلان ڪيو آهي، جڏهن ته آبنائي هرمز ۾ آمريڪي ناڪابندي جاري رکڻ جو فيصلو ڪيو ويو آهي.
Source link
Leave a Comment Leave a Comment
