واشنگٽن: آمريڪا جي نيشنل ڪائونٽر ٽيررازم سينٽر جي اڳوڻي ڊائريڪٽر جو ڪينٽ آمريڪا ۽ ايران جي وچ ۾ مفاهمت جي ياداشت تي باضابطه دستخط ٿيڻ جي آجيان ڪندي اميد ظاهر ڪئي آهي ته معاهدو خطي ۾ پائيدار امن جو سبب بڻجندو.
سوشل ميڊيا پليٽ فارم ايڪس تي پنهنجي بيان ۾ جو ڪينٽ چيو ته آمريڪي صدر ڊونلڊ ٽرمپ جي جنگ ختم ڪرڻ جي ڪوشش مثبت پيش رفت آهي. هن لکيو ته اهو تمام سٺو آهي ته ٽرمپ جنگ ختم ڪري رهيو آهي، منهنجي دعا آهي ته اهو امن قائم رهي.
اڳوڻي آمريڪي اهلڪار پنهنجي بيان ۾ وڌيڪ چيو ته جيڪڏهن امن معاهدي کي ڊگهي مدي ۾ برقرار رکڻو آهي ته خطي ۾ استحڪام کي ترجيح ڏيڻو پوندو ۽ اسرائيل جي فوجي سرگرمين کي محدود ڪرڻ ضروري هوندو.
جو ڪينٽ مارچ 2026 ۾ پنهنجي عهدي تان استعيفيٰ ڏني هئي، رپورٽن مطابق هن استعيفيٰ ڏني هئي ايران خلاف آمريڪا ۽ اسرائيل جي جنگي پاليسين تي اختلافن سبب.
سياسي مبصرن موجب جو ڪينٽ جو بيان ظاهر ڪري ٿو ته ڪجهه اڳوڻا آمريڪي عملدار وچ اوڀر ۾ ڇڪتاڻ گهٽائڻ ۽ سفارتي حل کي ترجيح ڏيڻ جي حق ۾ آهن.
هن جو خيال آهي ته ايران ۽ آمريڪا وچ ۾ تازو ٿيل مفاهمتي معاهدو تڏهن ئي ڪامياب ٿي سگهي ٿو جڏهن خطي جون سڀئي ڌريون تحمل ۽ محتاط رويو ڏيکارين.
اها تمام سٺي ڳالهه آهي ته صدر ٽرمپ ايران سان مفاهمتي معاهدي تي صحيحون ڪري هن جنگ کي ختم ڪري سگهيو.
مان دعا ڪريان ٿو ته امن قائم رهي – اسرائيل کي روڪڻ ۽ خطي ۾ استحڪام تي ڌيان ڏيڻ ضروري آهي انهي کي يقيني بڻائڻ لاءِ.
الله رحم ڪري آمريڪا 🇺🇸
جو ڪينٽ (@joekent16jan19) جون 18، 2026
اهو بيان هڪ اهڙي وقت ۾ سامهون آيو آهي جڏهن آمريڪا ۽ ايران وچ ۾ ٿيل تازي معاهدي کي خطي ۾ ڪيترن ئي مهينن کان جاري ڇڪتاڻ ختم ڪرڻ جي طرف اهم قدم قرار ڏنو پيو وڃي.
