آمريڪي صدر ڊونلڊ ٽرمپ دعويٰ ڪئي آهي ته آمريڪا پاڪستان جي درخواست تي ايران خلاف ڪارروائي روڪي هئي، جڏهن ته ايران سان ممڪنه معاهدو اڃا حتمي مرحلي ۾ نه اچي سگهيو آهي.
هڪ آمريڪي ٽي وي چينل کي انٽرويو ڏيندي صدر ڊونلڊ ٽرمپ چيو ته ايران هن وقت ڪمزور پوزيشن ۾ ڳالهيون ڪري رهيو آهي ۽ آمريڪا اڃا تائين تجويز ڪيل معاهدي تي مڪمل طور تي مطمئن ناهي. هن چيو ته ايران معاهدو ڪرڻ چاهي ٿو پر اڃا تائين معاهدو طئي ناهي ٿيو.
ڊونلڊ ٽرمپ چيو ته آمريڪا ايران سان به اهو ئي ڪري سگهي ٿو جيڪو هن وينزويلا سان ڪيو پر پاڪستان جي درخواست تي ايران خلاف ڪارروائي روڪي وئي. هن پاڪستان جي فوجي ۽ سياسي قيادت جي واکاڻ ڪندي چيو ته فيلڊ مارشل عاصم منير ۽ وزيراعظم شهباز شريف بهترين شخصيتون آهن.
آمريڪي صدر چيو ته ايران وٽ هاڻي ڪيترائي آپشن ناهن، يا ته معاهدو ٿيندو يا آمريڪا ڪم مڪمل ڪندو. هن واضح ڪيو ته ايران پاران انتهائي افزوده يورينيم ڇڏڻ جي بدلي ۾ پابنديون گهٽائڻ جي ڳالهه ناهي ڪئي وئي.
ٽرمپ وڌيڪ چيو ته هو ايران جي انتهائي افزوده يورينيم روس يا چين جي حوالي ڪرڻ جي به حق ۾ ناهي. سندس چوڻ هو ته آمريڪا چاهي ٿو ته ايران مڪمل طور تي بين الاقوامي اصولن موجب عمل ڪري.
اسٽريٽ آف هرمز بابت ڳالهائيندي ٽرمپ چيو ته هي عالمي شپنگ روٽ سڀني لاءِ کليل هوندو ۽ ان تي ڪو به ملڪ ڪنٽرول نه ڪندو. هن چيو ته ايران سان فريم ورڪ معاهدي جي صورت ۾ آبنائے هرمز کي فوري طور کوليو ويندو ۽ ٻيڙين جي آمد و رفت بحال ڪئي ويندي.
صدر ٽرمپ ايران جنگ بابت دعويٰ ڪئي ته ان ويڙهه ۾ رڳو 13 آمريڪي مارجي ويا، جڏهن ته افغانستان، عراق ۽ ٻين جنگين ۾ هزارين آمريڪي فوجي مارجي ويا.
سياسي مبصرن جو چوڻ آهي ته ٽرمپ جا تازا بيان ظاهر ڪن ٿا ته آمريڪا-ايران ڳالهيون اڃا تائين غير يقيني واري صورتحال ۾ آهن جڏهن ته پاڪستان جي امڪاني سفارتي ڪردار کي به عالمي سطح تي ڌيان ڏنو پيو وڃي.
