اسلام آباد:
پاڪ فضائيه جي سربراهه ايئر چيف مارشل ظهير احمد بابر صديقي ترڪي جي سرڪاري دوري دوران دفاعي، هوائي فوج ۽ ايئر اسپيس جي اعليٰ قيادت سان اهم ملاقاتون ڪيون.
ان موقعي تي ايئر چيف ترڪ ايئر فورس جي سربراهه جنرل ضياءَ ڪمال ڪاديو اوگلو، نيشنل ڊفينس واري وزير ياسر گلر ۽ بيڪار ٽيڪنالاجي جي چيف ٽيڪنالاجي آفيسر سلجوڪ بيريڪٽر سان ملاقاتون ڪيون. انهن ملاقاتن ۾ دفاعي تعاون، ايرو اسپيس جي جدت ۽ جديد ٽيڪنالاجي جي شعبن ۾ تعاون کي وڌيڪ فروغ ڏيڻ جي عزم جو ورجاءُ ڪيو ويو.
اعليٰ سطحي ملاقاتن جي سلسلي ۾ پاڪ فضائيه جي سربراهه پهرين ترڪ ايئر فورس هيڊ ڪوارٽر ۾ جنرل ضياءَ ڪمال ڪاديو اوگلو سان ملاقات ڪئي جتي کيس گارڊ آف آنر پيش ڪيو ويو ۽ سندس شاندار استقبال ڪيو ويو. ترڪي جي هوائي فوج جي چاڪ ۽ چوبند اسڪواڊرن پاران گارڊ آف آنر پيش ڪيو ويو، جيڪو ٻنهي ملڪن جي وچ ۾ ڊگهي برادرانه لاڳاپن ۽ گڏيل احترام جو مظهر هو.
ٻنهي ايئر چيفس گڏيل دلچسپي جي معاملن ۽ ٻطرفي فضائي تعاون کي مضبوط ڪرڻ جي مختلف پهلوئن تي تفصيلي خيالن جي ڏي وٺ ڪئي. ان موقعي تي پاڪستان ايئر فورس ۽ ترڪ ايئر فورس جي وچ ۾ گڏيل فوجي مشقن، پروفيشنل ايڪسچينج پروگرامن ۽ جديد تربيتي قدمن ذريعي آپريشنل ڪوآرڊينيشن ۽ گڏيل صلاحيت کي وڌيڪ فروغ ڏيڻ جي عزم کي ورجايو ويو.
ترڪ ايئر فورس جي سربراهه ترڪ پائلٽس جي تربيت ۾ پاڪستان ايئر فورس جي مسلسل تعاون کي ساراهيو ۽ ان کي ٻنهي هوائي فوجن جي وچ ۾ پيشه ورانه صلاحيتن ۽ آپريشنل مفاهمت جي فروغ لاءِ انتهائي اهم قرار ڏنو. موجوده دفاعي تعاون تي اطمينان جو اظهار ڪندي، ٻنهي طرفن اڀرندڙ شعبن ۾ ادارتي رابطن کي وڌيڪ مضبوط ڪرڻ جي عزم جو ورجاءُ ڪيو ته جيئن اُڀرندڙ سڪيورٽي چيلينجز کي موثر نموني منهن ڏئي سگهجي.
ان بعد پاڪ فضائيه جي سربراهه ترڪيءَ جي قومي بچاءَ واري وزير ياسر گلر سان ملاقات ڪئي. ملاقات ۾ ٻطرفن دفاعي تعاون، فوجي لاڳاپن ۽ مختلف شعبن ۾ گڏيل ڪوششن تي تفصيلي خيالن جي ڏي وٺ ڪئي وئي.
ايئر چيف پاڪستان ۽ ترڪي جي وچ ۾ تاريخي، ثقافتي ۽ ڀائراڻن لاڳاپن کي اجاگر ڪندي چيو ته ٻنهي ملڪن جا لاڳاپا اسلامي ڀائيچاري، گڏيل اعتماد ۽ گڏيل اسٽريٽجڪ مفادن تي ٻڌل آهن. ترڪ بچاءَ واري وزير موجوده قيادت پاران پاڪ فضائيه جي پيشه ورانه صلاحيتن کي جديد سطح تائين وڌائڻ جي عمل کي ساراهيو ۽ تربيت، صلاحيت وڌائڻ ۽ ايرو اسپيس تعاون جي شعبن ۾ ٻطرفن لاڳاپن کي وڌيڪ هٿي وٺرائڻ ۾ گهري دلچسپي جو اظهار ڪيو.
دوري دوران هڪ ٻي اهم ملاقات ۾ ايئر چيف بيڪار ٽيڪنالاجيز جي چيف ٽيڪنالاجي آفيسر سلجوق برڪت سان ملاقات ڪئي. ملاقات ۾ ٻنهي ملڪن جي وچ ۾ دفاعي ٽيڪنالاجيز ۾ گڏيل ويزن جي عڪاسي ڪندڙ ايرو اسپيس جي جدت، بي انسان فضائي نظام ۽ جديد ٽيڪنالاجي ۾ تعاون جي امڪانن تي خيالن جي ڏي وٺ ڪئي وئي.
پاڪ فضائيه جي سربراهه جو هي اهم دورو پاڪستان ۽ ترڪي جي وچ ۾ مضبوط ۽ ڊگھي اسٽريٽجڪ پارٽنرشپ جو واضح مظهر آهي. اهو دورو ان ڳالهه جو ثبوت آهي ته ٻئي ڀائر ملڪ دفاعي، ايرو اسپيس ۽ جديد ٽيڪنالاجي جي شعبن ۾ تعاون کي وڌائيندي پنهنجي لاڳاپن کي نئين بلندين تي وٺي وڃڻ لاءِ پرعزم آهن.
