ڪراچي:
ضلعي سينٽرل پوليس تيموريا ٿاڻي جي حد ۾ ڪارروائي ڪندي اسٽريٽ ڪرائم ۾ سرگرم پيءُ ۽ پٽ جي 8 رڪني گروپ کي گرفتار ڪري ورتو. جوابدار 100 کان وڌيڪ وارداتن ۾ ملوث هئا.
ايڪسپريس نيوز موجب ايس ايس پي سينٽرل ڊاڪٽر محمد عمران خان پنهنجي آفيس ۾ پريس ڪانفرنس ڪندي ٻڌايو ته ڊسٽرڪٽ سينٽرل پوليس اسٽريٽ ڪرائم ۾ سرگرم پيءُ ۽ پٽ جي سربراهي ۾ 8 رڪني گروپ کي گرفتار ڪري سندن قبضي مان 13 موبائيل فون، 8 واچون، 13 شهرين جا شناختي ڪارڊ، 4 ٿيلها، 6 اصل پستول، 2 موٽر سائيڪلون هٿ ڪيون آهن.
گرفتار جوابدارن ۾ منصور احمد ولد مرزا محمد شريف، سندس پٽ فهد، محمد عبيد ولد فيصل، مزمل پٽ جاويد علي، محمد عرفان ولد گلزار احمد، نعمان ولد نورالاسلام، عمران علي ولد راشد علي ۽ محمد زبير ولد عبدالشکور شامل آهن.
ايس ايس پي سينٽرل جو چوڻ هو ته گروهه جي گرفتاري لاءِ ايس ايڇ او تيموريا، ايس ايڇ او تيموريا ۽ ٽيڪنيڪل اسٽاف تي مشتمل ٽيم جوڙي وئي آهي.
ايس ايس پي سينٽرل جو چوڻ هو ته گرفتار جوابدار منصور گينگ جو سربراھ آهي جيڪو پنهنجي پٽ فهد ذريعي منظم طريقي سان گينگ هلائيندو هو جڏهن ته فهد ٻين ساٿين سان گڏجي اسٽريٽ ڪرائم جي وارداتن ۾ سڌي ريت ملوث رهيو آهي جڏهن ته عملي طور تي گينگ جي اڳواڻي ڪندو رهيو آهي. گينگ جا جوابدار مختلف علائقن ۾ خاص ڪري صبح جو 1 وڳي کان 3 وڳي تائين وارداتون ڪندا هئا.
هي گينگ لياقت آباد، شارع فيصل ۽ لياري ايڪسپريس وي جي چوڌاري سرگرم هو ۽ هو خاص ڪري نوجوان شهرين کي نشانو بڻائيندا هئا ۽ موبائل فون ڦرڻ وقت شهرين جي پاس ورڊ ۽ لاڪ سان کيڏندا هئا ۽ شهرين جي بئنڪنگ ايپس تائين رسائي حاصل ڪندا هئا. گرفتار جوابدارن ۾ عمران، زبير ۽ نعمان چوري ٿيل موبائل فون جي خريد و فروخت ۾ ملوث هئا.
ڊاڪٽر عمران خان چيو ته گرفتار جوابدار عمران ٻين ڏوهارين کان چوري ٿيل موبائيل فون خريد ڪندو هو ۽ آءِ ايم اي آءِ تبديل ڪري مارڪيٽ ۾ وڪرو ڪندو هو.
هن چيو ته گرفتار جوابدار ان غير قانوني ٽيڪنڪ ۾ ماهر هئا ۽ قيمتي سمارٽ فونز جي آءِ ايم اي آءِ تبديل ڪري سستا موبائل فون ٺاهي وڏي اگهه تي وڪرو ڪندا هئا.
