ڪويت پنهنجي خلاف مبينا ايراني حملن جي سخت مذمت ڪندي انهن کي قومي خودمختياري، قومي سلامتي ۽ عالمي قانونن جي واضح خلاف ورزي قرار ڏنو آهي.
ڪويت جي پرڏيهي وزارت طرفان جاري ڪيل بيان ۾ چيو ويو آهي ته ايران پاران لڳاتار لڳاتار حملا نه رڳو ڪويت جي سلامتي لاءِ خطرو آهن پر پوري خطي ۾ امن ۽ استحڪام جي ڪوششن کي به نقصان پهچائي رهيا آهن.
وزارت موجب، اهي ڪارناما خطي ۾ ڇڪتاڻ گهٽائڻ لاءِ جاري علائقائي ۽ عالمي سفارتي ڪوششن کي متاثر ڪري رهيا آهن ۽ عالمي برادري جي امن قائم ڪرڻ جي ڪوششن لاءِ سڌو چئلينج آهن.
بيان ۾ وڌيڪ چيو ويو ته اهڙن حملن سان ڪويت جي شهرين ۽ ملڪ ۾ رهندڙ پرڏيهي رهواسين جي جان ۽ مال کي به خطرو آهي، ان ڪري عالمي برادري کي صورتحال جو سخت نوٽيس وٺڻ گهرجي.
ڪويت هڪ ڀيرو ٻيهر پنهنجي خودمختياري ۽ علائقائي سالميت جي تحفظ جي عزم کي ورجائيندي چيو ته ملڪ عالمي قانونن جي پاسداري ۽ خطي ۾ امن ۽ استحڪام جي قيام لاءِ پنهنجي اتحادين ۽ عالمي تنظيمن سان تعاون جاري رکندو.
واضح رهي ته گذريل ڪجهه ڏينهن کان ايران ۽ نار جي ڪجهه ملڪن وچ ۾ ڇڪتاڻ ۾ اضافو ٿيو آهي، جنهن سبب سڄي خطي ۾ سيڪيورٽي خدشا وڌي ويا آهن.
