پاڪستان ڪرڪيٽ بورڊ جي چيئرمين ۽ وفاقي گهرو وزير محسن نقوي ايل سي سي اي گرائونڊ ۾ جاري ريڊ بال ڪيمپ جو دورو ڪيو، جتي هن رانديگرن ۽ ڪوچز سان ملاقات ڪئي ۽ تربيتي سرگرمين جو جائزو ورتو.
ان موقعي تي ڊائريڪٽر هاءِ پرفارمنس عاقب جاويد، اڳوڻو ڪپتان سرفراز احمد ۽ مصباح الحق، مائيڪ هيسن ۽ ٻيا ڪوچ پڻ موجود هئا.
ميڊيا سان ڳالهائيندي محسن نقوي چيو ته پاڪستان ڪرڪيٽ ۾ سڌارن لاءِ نئين پاليسين تي ڪم مڪمل ڪيو پيو وڃي.
هن چيو ته ٽي 20، ون ڊي ۽ ٽيسٽ ڪرڪيٽ لاءِ الڳ حڪمت عمليون ٺاهيون ويون آهن ۽ رانديگرن جي سليڪشن سسٽم کي ڪمپيوٽرائيزڊ ڪيو پيو وڃي ته جيئن انساني مداخلت کي گهٽ ڪري سگهجي. هن چيو ته چونڊ عمل ۾ 85 سيڪڙو فيصلا ڊيٽا، فٽنيس ۽ ڪارڪردگي تي ٻڌل هوندا.
چيئرمين پي سي بي واضح ڪيو ته سينٽرل ڪانٽريڪٽ لاءِ ڊوميسٽڪ ڪرڪيٽ کيڏڻ لازمي هوندو ۽ مقرر معيار تي پورو نه لهندڙ رانديگر کي ڪانٽريڪٽ نه ملندو.
هن چيو ته سينٽرل ڪانٽريڪٽ لاءِ 5 ڪيٽيگريز متعارف ڪرايا پيا وڃن، جڏهن ته اڀرندڙ رانديگرن لاءِ به خاص ڪيٽيگري ٺاهي وئي آهي، جنهن تي خاص ڌيان ڏنو ويندو.
محسن نقوي اعلان ڪيو ته ٽنهي فارميٽس ٽيسٽ، ون ڊي ۽ ٽي 20 ۾ ميچ جي فيس ۾ واڌ ڪئي پئي وڃي، جڏهن ته ڊوميسٽڪ ڪرڪيٽرن جي فيس ۾ به واڌ تي ڪم جاري آهي. هن موجب ڪنهن به رانديگر کي ترقي ڪرڻ لاءِ فٽنس، گهريلو ڪارڪردگي ۽ مجموعي ڪارڪردگي جي مرحلن مان گذرڻو پوندو آهي.
هن چيو ته سمورن رانديگرن کي سومر تي مشاورت لاءِ سڏيو ويو آهي ڇاڪاڻ ته اهي عمل ۾ اهم اسٽيڪ هولڊر آهن. هن چيو ته موجوده سڌارن جا نتيجا هڪ کان ٻن سالن ۾ ظاهر ٿيندا ۽ پاڪستان ڪرڪيٽ کي ڊگهي مدي جي بنياد تي مضبوط ڪرڻ ۾ مدد ملندي.
ٽيسٽ ڪپتاني جي حوالي سان محسن نقوي جو چوڻ هو ته اهو فيصلو هو پاڻ نه ڪندو پر لاڳاپيل ٽيم ۽ سليڪشن اختيارين ان بابت فيصلو ڪندا.
شاداب خان جي ممڪن ڪپتاني بابت سوال تي هن چيو ته ان حوالي سان سندس علم ۾ ڪا به حتمي ڳالهه ناهي. سرفراز احمد بابت هن چيو ته هو پاڪستان ڪرڪيٽ جو اهم اثاثو آهي ۽ سندس ڪردار بابت اڃا تائين ڪو به حتمي فيصلو ناهي ڪيو ويو.
محسن نقوي ان اميد جو اظهار ڪيو ته نئين پاليسين سان قومي ٽيم جي ڪارڪردگي بهتر ٿيندي. هن چيو ته ماضي ۾ ڪجهه غلط پاليسين ۽ ذاتي مفادن سبب پاڪستان ڪرڪيٽ کي نقصان پهتو پر هاڻي اداري کي پروفيشنل بنيادن تي هلائي پيو وڃي ته جيئن قومي ٽيم بهتر نتيجا ڏئي سگهي.
هن چيو ته خراب پرفارمنس جو سبب غلط سوچ آهي، جتي ماڻهو ملڪ لاءِ نه پر پنهنجي لاءِ ڪرڪيٽ کيڏي رهيا آهن.
محسن نقوي چيو ته حڪومت آزاد ڪشمير جا ڪيترائي مطالبا مڃيا پر ان باوجود احتجاجي رويو جاري آهي. سندس چوڻ هو ته آزاد ڪشمير جي قيادت 28 نقطا کڻي آئي، جنهن مان 26 مطالبا مڃيا ويا، پر ان باوجود اطمينان جو اظهار نه ڪيو ويو.
هن چيو ته پهرين ڪڻڪ تي رعايت حاصل ڪئي وئي، بعد ۾ بجلي جي اگهن تي احتجاج شروع ڪيو ويو. هن چيو ته جيڪڏهن ساڳي طرح مطالبا مڃيا ويا ته ملڪ جي ٻين علائقن جا عوام به مهانگي بجلي خلاف احتجاج ڪري سگهن ٿا.
گهرو وزير چيو ته حڪومت پنهنجو آئيني مدو پورو ڪندي ۽ عوامي مسئلن جي حل لاءِ قدم کڻندي.
تيل جي عالمي قيمتن بابت ڳالهائيندي محسن نقوي چيو ته تيل جي قيمتن ۾ گهٽتائي سبب سڄي دنيا ۾ معاشي دٻاءُ آهي پر پاڪستان صورتحال کي نسبتاً بهتر نموني سان سنڀاليو آهي. سندس چوڻ هو ته حڪومت پنهنجي بين الاقوامي لاڳاپن کي استعمال ڪندي ايندھن جي فراهمي کي يقيني بڻايو، جنهن سان پيٽروليم شين جي قيمتن ۾ غير معمولي واڌ کان بچڻ ممڪن ٿيو.
هن چيو ته جيڪڏهن بروقت انتظام نه ڪيا ويا ته پيٽرول جي اگهن ۾ 200 کان 250 رپيا واڌ جو امڪان آهي. محسن نقوي چيو ته الله جي فضل سان پاڪستان ان دٻاءُ مان بچي ويو ۽ موجوده صورتحال ۾ ملڪ جي حالت اڳ کان بهتر آهي. هن اها به اميد ظاهر ڪئي ته آمريڪا ۽ ايران وچ ۾ هڪ معاهدو جلد ٿي سگهي ٿو، جنهن سان عالمي توانائي مارڪيٽن ۾ استحڪام جو امڪان آهي.
