بيجنگ (م ڊ) چين آمريڪا جي چيني ڪمپنين خلاف تازي ڪارروائي جي جواب ۾ 10 آمريڪي فوجي ڪمپنين تي ايڪسپورٽ پابندي لڳائي ڇڏي آهي. اهو قدم ٻن عالمي طاقتن جي وچ ۾ وڌندڙ واپار ۽ اسٽريٽجڪ تڪرار جي وچ ۾ اچي ٿو.
چين جي واپار واري وزارت موجب انهن آمريڪي ڪمپنين کي سامان جي فراهمي کان روڪيو ويو آهي جيڪي فوجي ۽ سول ٻنهي مقصدن لاءِ استعمال ٿي سگهن ٿا.
واپار واري وزارت پنهنجي بيان ۾ چيو آهي ته اهو فيصلو چين جي قومي سلامتي ۽ قومي مفادن جي تحفظ لاءِ ڪيو ويو آهي.
چيني اختيارين موجب آمريڪا تازو ئي چيني ڪمپنين خلاف غير منصفاڻي قدم کنيا آهن ۽ چيني فوجي ادارن سان لاڳاپيل ڪمپنين جي لسٽ ۾ وڌيڪ نالا شامل ڪيا آهن، جنهن جي جواب ۾ هي قدم کنيو ويو آهي.
چين جو چوڻ آهي ته آمريڪي حڪومت جو الزام ته چيني ڪمپنيون فوجي سرگرمين ۾ ملوث آهن بي بنياد آهن ۽ ٻنهي ملڪن وچ ۾ واپاري لاڳاپا متاثر ڪري رهيا آهن.
ياد رهي ته هن مهيني آمريڪي بچاءَ واري کاتي ڪجهه وڏين ۽ مشهور چيني ڪمپنين کي پنهنجي واچ لسٽ ۾ شامل ڪيو هو. انهن ڪمپنين ۾ معروف ٽيڪنالاجي ۽ اي ڪامرس ڪمپني علي بابا، برقي گاڏيون ٺاهيندڙ BYD ۽ سرچ انجڻ ۽ مصنوعي ذهانت واري ڪمپني Baidu شامل آهن.
آمريڪي عملدارن جو خيال آهي ته انهن ڪمپنين جو ڪنهن نه ڪنهن صورت ۾ چيني فوج سان تعلق آهي، پر ڪمپنيون ماضي ۾ اهڙن الزامن کي رد ڪري چڪيون آهن.
ماهرن موجب آمريڪا ۽ چين وچ ۾ ٽيڪنالاجي، واپار، دفاع ۽ قومي سلامتي جي معاملن تي جاري ڇڪتاڻ هاڻي نئين مرحلي ۾ داخل ٿي رهي آهي. ٻنهي ملڪن پاران جوابي قدمن جا اثر عالمي سپلائي زنجيرن، دفاعي صنعت ۽ بين الاقوامي واپار تي اثرانداز ٿي سگهن ٿا.
معاشي ماهرن موجب جيڪڏهن اهو ڇڪتاڻ وڌيڪ وڌيو ته ان جا اثر عالمي مارڪيٽن، ٽيڪنالاجي شعبي ۽ سيڙپڪاري جي ماحول تي به پئجي سگهن ٿا.
