تل ابيب: اسرائيل جي نيشنل سائبر ڊائريڪٽوريٽ جي ڊائريڪٽر جنرل يوسي ڪرادي دعويٰ ڪئي آهي ته ايران خلاف آمريڪا-اسرائيلي جنگ جي شروعات کان وٺي اسرائيل تي ايراني سائبر حملن ۾ تمام گهڻو اضافو ٿيو آهي.
پرڏيهي ميڊيا رپورٽن موجب يو سي ڪرادي جرمن اخبار ڊي ويلٽ کي انٽرويو ڏيندي چيو ته جون 2025 ۾ اسرائيل خلاف سائبر حملن ۽ ٻين دشمن سرگرمين جو انگ 1600 هو، جيڪو جون 2026 ۾ وڌي 4800 ٿي ويو آهي.
هن دعويٰ ڪئي ته ڪجهه سائبر گينگز انتهائي مهارت رکندڙ آهن ۽ انهن کي منهن ڏيڻ جي صلاحيت آهي، پر انهن خطرن کي نظرانداز نٿو ڪري سگهجي.
سندس موجب، روايتي جنگ جي برعڪس، سائبر دنيا ۾ ڪا به جنگبندي ناهي، تنهنڪري مسلسل خبردار رهڻ جي ضرورت آهي.
يو سي ڪرادي جي مطابق، مبينا سائبر حملن اسرائيل جي نازڪ انفراسٽرڪچر، وڏين تجارتي ۽ صنعتي ڪمپنين، سرڪاري ادارن ۽ ننڍن ڪاروبارن کي نشانو بڻايو، جن ۾ قانوني ۽ اڪائونٽنگ سروسز فراهم ڪندڙ شامل آهن.
هن وڌيڪ دعويٰ ڪئي ته ڪجهه تنظيمون جن جو سائبر سيڪيورٽي سسٽم نسبتاً ڪمزور هو انهن جا ڪمپيوٽر سسٽم مڪمل طور تي تباهه يا ڊهي ويا.
واضح رهي ته ايران ان بيان تي فوري طور تي ڪو به رد عمل جاري ناهي ڪيو، جڏهن ته ٻنهي ملڪن وچ ۾ سائبر سرگرمين جا الزام ماضي ۾ به سامهون ايندا رهيا آهن.
