واشنگٽن: آمريڪي صدر ڊونلڊ ٽرمپ آمريڪا جي 250 هين يوم آزادي جي تقريب کي خطاب ڪندي دعويٰ ڪئي آهي ته آمريڪا ايران جي فوجي صلاحيت کي مڪمل طور تباهه ڪري ڇڏيو آهي.
واشنگٽن جي نيشنل مال ۾ منعقد ڪيل ’سيليوٽ ٽو آمريڪا‘ تقريب کي خطاب ڪندي صدر ٽرمپ پنهنجي پرڏيهي پاليسي ۽ آمريڪا جي تازي قدمن جو دفاع ڪيو.
خطاب دوران هن چيو ته اسان وڏيون ڪاميابيون حاصل ڪيون آهن. توهان وينزويلا کي ڏسو، توهان ايران کي ڏسو، اسان ان کي تباهه ڪيو، انهن جي فوج کي تباهه ڪيو.
آمريڪي صدر پنهنجي تقرير ۾ ايران خلاف دعويٰ جا وڌيڪ تفصيل فراهم نه ڪيا ۽ نه ئي ڪنهن خاص فوجي ڪارروائي جو ذڪر ڪيو.
ٽرمپ جو اهو بيان اهڙي وقت سامهون آيو آهي جڏهن وچ اوڀر جي صورتحال، ايران بابت آمريڪي پاليسي ۽ خطي ۾ سيڪيورٽي جا مسئلا عالمي ڌيان جو مرڪز بڻيل آهن.
سياسي مبصرن موجب آمريڪي صدر جي ان بيان کي اندروني سياست، قومي سلامتي ۽ پرڏيهي پاليسي جي تناظر ۾ ڏٺو پيو وڃي، جڏهن ته ايران طرفان ان دعويٰ تي فوري طور تي ڪو به باضابطا رد عمل سامهون ناهي آيو.
ماهرن جو چوڻ آهي ته اهڙا بيان خطي ۾ جاري سفارتي ۽ سياسي ڇڪتاڻ تي اثرانداز ٿي سگهن ٿا، ان ڪري انهن جي عملي ۽ فوجي حيثيت جو تعين بعد ۾ سامهون ايندڙ سرڪاري ثبوتن ۽ معلومات جي روشنيءَ ۾ ئي ڪيو ويندو.
