افغانستان ۾ طالبان حڪومت جي بدترين اقتدار ۾ افغان عورتن کان پوءِ هاڻي نوجوانن جو مستقبل اونداهو ٿيڻ لڳو آهي.
افغان عورتن تي پابنديون لاڳو ڪرڻ کانپوءِ طالبان حڪومت نوجوانن کي تعليم جي بنيادي حق کان به محروم ڪري ڇڏيو آهي. ان حوالي سان عالمي جرنل دي گارڊين موجب گڏيل قومن جي تنظيم تعليم، سائنس ۽ ثقافت طالبان جي دور ۾ اعليٰ تعليم حاصل ڪندڙ شاگردن جي تعداد ۾ سخت گهٽتائي جي نشاندهي ڪئي آهي.
گڏيل قومن ۾ انساني حقن جي سربراهه وولڪر ترڪ جو چوڻ آهي ته افغان طالبان حڪومت لکين افغان شهرين کي بنيادي حقن کان محروم ڪري انساني حقن جي سنگين ڀڃڪڙي ڪئي آهي.
دي گارڊين جي رپورٽ موجب افغان طالبان جي حڪومت ۾ پڙهندڙ نوجوان شاگردن جي بدترين صورتحال تي ڪنهن به عالمي فورم تي بحث نه پيو ڪيو وڃي.
هڪ افغان شاگرد جو چوڻ آهي ته شاگردن کي ڏاڙهي ۽ ڪپڙن بابت طالبان جي سخت قاعدن جي ڀڃڪڙي ڪرڻ تي وحشيانه تشدد کي منهن ڏيڻو پوي ٿو.
دي گارڊن جي رپورٽ ۾ چيو ويو آهي ته افغانستان جي اعليٰ يونيورسٽين جو معيار تعليمي شعبي مان تجربيڪار پروفيسرن جي وڃڻ سبب تمام گهڻو خراب ٿي ويو آهي. افغان طالبان جو مقصد تعليمي ادارن کي مڪمل طور تي مفلوج ڪري نوجوان نسل کي تباهه ڪرڻ آهي.
ڀارتي صحافي ڌرم جوٽ موجب طالبان حڪومت پاران روزگار ۽ تعليم تي سخت پابنديون افغان عوام جي بنيادي حقن جو بدترين استحصال آهي. افغانستان تي مسلط ٿيل طالبان حڪومت انساني حقن جي سنگين ڀڃڪڙين جو بدترين مثال بڻجي چڪي آهي.
