اسلام آباد:
وزيراعظم شهباز شريف گلگت بلتستان لاءِ 100 ميگاواٽ جي سولر منصوبي کي شفافيت ۽ بروقت مڪمل ڪرڻ جي هدايت ڪئي آهي.
وزيراعظم محمد شهباز شريف جي صدارت هيٺ گلگت بلتستان لاءِ 100 ميگاواٽ جي سولر انرجي منصوبي جو جائزو ورتو ويو، جنهن ۾ منصوبي جي اڳڀرائي ۽ مستقبل جي مرحلن جو تفصيلي جائزو ورتو ويو.
وزيراعظم چيو ته ماحول دوست، صاف، سستي ۽ پائيدار توانائي جو فروغ قومي توانائي پاليسي جو اهم حصو آهي. 100 ميگاواٽ جو سولر منصوبو وفاقي حڪومت جو گلگت بلتستان جي عوام لاءِ تحفو آهي.
هن پاور ڊويزن کي هدايت ڪئي ته هو منصوبي جي انسٽاليشن ۽ بروقت مڪمل ڪرڻ جي حوالي سان ذميواريون پوريون ڪري. شهباز شريف ان ڳالهه تي زور ڏنو ته سولر منصوبن جي خريداري جي سمورن مرحلن ۾ مڪمل شفافيت کي يقيني بڻايو وڃي ۽ سموريون ادائگيون ٽئين پارٽي جي تصديق کانپوءِ ئي ڪيون وڃن.
اجلاس کي ڏنل بريفنگ ۾ ٻڌايو ويو ته منصوبي تحت ڊسمبر 2026ع تائين گلگت بلتستان ۾ 499 سرڪاري عمارتن جي ڇتن تي بيٽري اسٽوريج سميت 18 ميگاواٽ جو سولر سسٽم نصب ڪيو ويندو، بريفنگ ۾ ٻڌايو ويو ته 82 ميگاواٽ جي يوٽيلٽي اسڪيل سولر منصوبي جي پي سي ون ايپ اي سي اين آءِ سي کي موڪلي وئي آهي.
بريفنگ ۾ وڌيڪ ٻڌايو ويو ته 82 ميگاواٽ جي سولر منصوبي مان 1.3 لک ماڻهو فائدو حاصل ڪندا، جڏهن ته منصوبي جي مڪمل ٿيڻ سان گلگت بلتستان ۾ بجلي جي فراهمي جو معيار بهتر ٿيندو ۽ لوڊشيڊنگ جي خاتمي ۾ مدد ملندي.
اجلاس ۾ پاور ڊويزن واري وفاقي وزير سردار اويس لغاري، ناڻي ۽ ريلوي واري مملڪتي وزير بلال اظهر ڪياني ۽ لاڳاپيل اعليٰ سرڪاري عملدارن شرڪت ڪئي.
