برلن: آمريڪا جرمني کي جديد ٽماهاڪ ڪروز ميزائل ۽ زمين تي مار ڪندڙ ٽائفون لانچرز جي وڪري جي منظوري ڏئي ڇڏي آهي، جنهن کي ٻنهي ملڪن جي وچ ۾ دفاعي تعاون ۾ وڏي پيش رفت قرار ڏنو پيو وڃي.
پرڏيهي ميڊيا رپورٽن موجب نيٽو سربراهه اجلاس جي موقعي تي جرمن چانسلر جو چوڻ هو ته انقره ۾ ٿيندڙ ملاقاتون اميدن کان وڌيڪ ڪارائتيون رهيون، جتي آمريڪا سان اتفاق ڪيو ويو ته جرمني آمريڪا کان ٽماهاڪ ميزائل خريد ڪري مستقبل ۾ پنهنجي سرزمين تي نصب ڪندو.
جرمن چانسلر چيو ته ان قدم جو مقصد جرمني جي دفاعي صلاحيت ۾ هڪ اهم اسٽريٽجڪ خال ڀرڻ آهي. هن چيو ته ان سان گڏ يورپ به پنهنجي دفاعي نظام جي تياري ۽ خطي ۾ جديد دفاعي صلاحيتن جي تعينات تي ڪم ڪري رهيو آهي.
رپورٽن مطابق آمريڪي حڪومت اڱاري تي دستخط ڪيل خط جي ذريعي جرمني کي يقين ڏياريو آهي ته ٽماهاڪ ميزائل ۽ ٽائفون لانچرز جي وڪرو جي باضابطه طور تي آگسٽ ۾ منظوري ڏني ويندي.
بهرحال، جرمن عملدارن اهو واضح نه ڪيو ته ڪيترا Tomahawk ميزائل يا ڪيترا ٽائفون لانچر جرمني خريد ڪرڻ جو ارادو رکي ٿو. حڪومتي ذريعن موجب اها معلومات دفاعي حساسيت سبب ڳجهي رکي وئي آهي.
دفاعي ماهرن موجب ٽماهاڪ ڪروز ميزائل ڊگھي رينج تائين هدفن کي وڌيڪ درستي سان نشانو بڻائڻ جي صلاحيت رکي ٿو، جڏهن ته ٽائيفون لانچر کي مختلف قسمن جي جديد ميزائلن کي مارڻ لاءِ استعمال ڪيو ويندو آهي.
ماهرن جو چوڻ آهي ته ان معاهدي کي يورپ ۾ دفاعي صلاحيت وڌائڻ ۽ نيٽو جي ميمبر ملڪن وچ ۾ فوجي تعاون کي مضبوط ڪرڻ جي ڪوششن جو حصو قرار ڏنو پيو وڃي.
