آمريڪي صدر ڊونلڊ ٽرمپ ايران کي خبردار ڪيو آهي ته جيڪڏهن ايران کيس مارڻ جي ڪوشش ڪئي ته آمريڪا وٽ ايران کي نشانو بڻائڻ لاءِ 1000 ميزائل تيار آهن، ان کانپوءِ هزارين وڌيڪ ميزائل استعمال ڪري سگهجن ٿا.
ميڊيا رپورٽن موجب ٽرمپ اهو بيان پنهنجي سوشل ميڊيا پليٽ فارم ٽرٿ سوشل تي جاري ڪيو. هن چيو ته هن آمريڪي فوج کي هدايتون ڏنيون آهن ته جيڪڏهن ايران طرفان مٿن ڪو قاتلاڻو حملو ٿيو ته ان جو فوري ۽ سخت فوجي جواب ڏنو وڃي.
اهو بيان اهڙي وقت سامهون آيو آهي جڏهن آمريڪا ۽ ايران وچ ۾ ڇڪتاڻ هڪ ڀيرو ٻيهر وڌي وئي آهي. تازن ڏينهن ۾ ايران ۾ ڪجهه گڏجاڻين ۾ ٽرمپ خلاف سخت نعرا هنيا ويا، جنهن کانپوءِ آمريڪي انتظاميا سڪيورٽي خدشن جو اظهار ڪيو.
ايراني عملدارن ماضي ۾ ٽرمپ جي بيانن کي اشتعال انگيز قرار ڏنو آهي ۽ ٻنهي ملڪن وچ ۾ سفارتي ڇڪتاڻ برقرار آهي.
