ترڪي ۾ غير قانوني مهاجرن خلاف وڏي پيماني تي ڪريڪ ڊائون جاري آهي، گرفتار ٿيلن ۾ سڀ کان مٿي افغان شهري آهن.
عالمي خابرو اداري موجب ترڪي ۾ غير قانوني مهاجرن ۽ انساني اسمگلرن خلاف هنگامي آپريشن جاري آهي.
ترڪي جي ڊائريڪٽوريٽ آف مائيگريشن مئنيجمينٽ (مائيگريشن ڊپارٽمينٽ) گرفتار غير قانوني مهاجرن بابت تازي رپورٽ جاري ڪئي آهي، جنهن موجب هلندڙ سال جي پهرين 6 مهينن ۾ رڪارڊ 70 هزار غير قانوني مهاجرن کي گرفتار ڪيو ويو آهي، جن ۾ 19 هزار 574 غير قانوني افغان پناهگير ۽ 6 هزار کان وڌيڪ انساني اسمگلر شامل آهن.
گڏيل قومن جي انگن اکرن موجب هلندڙ سال جي پهرين 5 مهينن دوران ترڪي مان 13 هزار کان وڌيڪ غير قانوني افغان شهرين کي ملڪ بدر ڪيو ويو آهي.
معروف افغان خبر رساں ايجنسي خاما پريس موجب طالبان جي حڪومت ۾ معاشي بحران، وڌندڙ بيروزگاري ۽ صنفي پابندين سبب لکين افغاني ملڪ ڇڏي ويا آهن. سمورين مشڪلاتن ۽ ڇڪتاڻ باوجود افغان پناهگيرن جو ترڪي ذريعي يورپ وڃڻ جو سلسلو جاري آهي.
عالمي ماهرن جو چوڻ آهي ته غير قانوني افغان پناهگيرن جي آڙ ۾ انساني اسمگلنگ ۽ منشيات جا ڏوهن ۾ اضافو ٿي رهيو آهي، جيڪي ميزبان ملڪن جي امن ۽ امان لاءِ مسلسل خطرو آهن.
ماهرن جو چوڻ آهي ته طالبان جي حڪومت ۾ افغانستان ۾ جاري معاشي تباهي ۽ انساني حقن جي ڀڃڪڙي دراصل ان غير قانوني لڏپلاڻ جو اصل ڪارڻ آهي. هن خبردار ڪيو آهي ته جيستائين افغانستان ۾ جبر جو موجوده نظام تبديل نه ٿيندو تيستائين مهاجرن جو اهو سخت بحران جاري رهندو.
