ايران جي سپاه پاسداران انقلاب اسلامي اردن جي عوام لاءِ جاري ڪيل پيغام ۾ چيو آهي ته ايران جي اردن ۽ ان جي عوام سان ڪا به دشمني ناهي پر ان جي ڪارروائي جو مقصد صرف آمريڪي فوجي اڏا ۽ خطي ۾ آمريڪي فوجي موجودگي آهي.
ايراني پاسداران انقلاب طرفان جاري ڪيل بيان ۾ چيو ويو آهي ته ايران اردن جي عوام جو احترام ڪري ٿو ۽ انهن کي هڪ دوست ۽ باوقار قوم سمجهي ٿو. ”اسان جي توهان جي ملڪ سان ڪا دشمني ناهي، پر اسان اردن جي عظيم ماڻهن سان پيار ڪريون ٿا،“ بيان ۾ چيو ويو آهي.
IRGC جي مطابق، اردن جي عوام فلسطيني عوام جي مصيبتن ۽ مشڪلاتن کي چڱيءَ طرح سمجهن ٿا ۽ غزه ۾ ٿيندڙ تباهي ۽ انساني جانين جي نقصان کان به چڱي ريت واقف آهن.
بيان ۾ وڌيڪ چيو ويو آهي ته خطي ۾ آمريڪي فوجي اڏن جي موجودگي ڇڪتاڻ ۾ واڌ جو سبب بڻجي رهي آهي. ايران جو خيال آهي ته جيڪڏهن خطي مان آمريڪي فوجي اڏا ختم ڪيا وڃن ته نه رڳو فلسطيني عوام کي فائدو ٿيندو پر سڄي وچ اوڀر ۾ امن ۽ استحڪام جا امڪان به وڌي ويندا.
پنهنجي پيغام جي آخر ۾ پاسداران انقلاب اردن جي لاءِ نيڪ خواهشن جو اظهار ڪندي چيو ته هو اردن جي ڪاميابي ۽ خطي ۾ امن جي خواهشمند آهن.
اهو بيان هڪ اهڙي وقت سامهون آيو آهي جڏهن ايران ۽ آمريڪا وچ ۾ ڇڪتاڻ جاري آهي ۽ خطي ۾ فوجي سرگرمين سبب مختلف ملڪن ۾ خدشا آهن. ايران جي تازي بيانن کي خطي جي موجوده سيڪيورٽي صورتحال جي تناظر ۾ اهم پيش رفت قرار ڏنو پيو وڃي.
