ابوظهبي: گڏيل عرب امارات ۾ ڀارتي سفارتخاني تصديق ڪئي آهي ته آبنائي هرمز ۾ ٻن تجارتي جهازن تي ميزائل حملن ۾ هڪ ڀارتي ملاح مارجي ويو آهي.
ڀارتي سفارتخاني طرفان جاري ڪيل بيان ۾ چيو ويو آهي ته جن ٻن جهازن تي حملو ڪيو ويو اهي الباهيا ۽ ممباسا بي هئا.
رپورٽن مطابق اومان جي سامونڊي حدن ۾ ڀارتي شهري جي مارجڻ تي ڀارت ايران جي نائب سفير کي طلب ڪري احتجاج رڪارڊ ڪرايو آهي.
پنهنجي بيان ۾ سفارتخاني ڀارتي ملاح جي موت تي گهري ڏک ۽ افسوس جو اظهار ڪيو ۽ چيو ته مقتول جي خاندان سان دلي تعزيت جو اظهار ڪيو ويو.
بيان موجب ڀارتي سفارتخانو مسلسل صورتحال جي نگراني ڪري رهيو آهي ۽ مقامي اختيارين سان رابطي ۾ آهي ته جيئن زخمين ۽ متاثر خاندانن کي هر ممڪن سفارتي ۽ قونصلر مدد فراهم ڪئي وڃي.
سفارتخاني جو چوڻ آهي ته واقعي سان لاڳاپيل سمورين اڳڀرائي جي نگراني ڪئي پئي وڃي ۽ جيڪڏهن ضرورت پئي ته وڌيڪ امدادي قدم کنيا ويندا.
اهو واقعو هڪ اهڙي وقت ۾ سامهون آيو آهي جڏهن آبنائے هرمز ۾ تازي فوجي ڇڪتاڻ تجارتي جهازن جي سيڪيورٽي بابت خدشا پيدا ڪيا آهن. عالمي شپنگ انڊسٽري ۽ مختلف ملڪ هن اهم آبي گذرگاهه جي سيڪيورٽي صورتحال تي ويجهڙائي سان نظر رکي رهيا آهن.
حملي جا وڌيڪ تفصيل، مارجي ويل ڀارتي شهري جي سڃاڻپ يا زخمين جو انگ اڃا تائين سرڪاري طور تي جاري ناهي ڪيو ويو.
