واشنگٽن: آمريڪا ايران جي تيل جي برآمد ۽ شپنگ نيٽ ورڪ خلاف ڪارروائي ڪندي 50 کان وڌيڪ ماڻهن، ڪمپنين ۽ جهازن تي نيون پابنديون لاڳو ڪري ڇڏيون آهن.
آمريڪي اسٽيٽ ڊپارٽمينٽ طرفان جاري ڪيل بيان ۾ چيو ويو آهي ته اهي پابنديون ايراني شپنگ ۽ تيل جي واپار سان لاڳاپيل نيٽ ورڪ تي لاڳو ڪيون ويون آهن، جنهن کي آمريڪا پابندين کان بچڻ ۽ ايراني تيل جي برآمد جاري رکڻ جو هڪ وسيلو قرار ڏنو آهي.
بيان ۾ چيو ويو آهي ته نيٽ ورڪ ايراني تيل جي مشهور واپاري محمد حسين شمخاني سان ڳنڍيل آهي، جنهن تي مختلف ملڪن ۾ موجود ڪمپنين ۽ جهازن ذريعي آمريڪي پابندين کان بچڻ جي ڪوشش ڪرڻ جو الزام آهي.
آمريڪي اسٽيٽ ڊپارٽمينٽ موجب، نيٽ ورڪ ۾ ايراني ۽ غير ملڪي شهري، ڪمپنيون ۽ ادارا شامل آهن جيڪي مبينا طور تي آف شور شيل ڪمپنين ذريعي پابندين جي باوجود تيل ۽ ٻين شين جو واپار ڪن ٿا ۽ آمدني منتقل ڪن ٿا.
واشنگٽن جو چوڻ آهي ته نيٽ ورڪ ايران جي تيل جي مسلسل برآمدات ۾ حصو وٺي رهيو آهي، جڏهن ته ايراني حڪومت انهن وسيلن مان فائدو وٺي رهي آهي.
آمريڪي عملدارن چيو آهي ته آمريڪا ايران کي پنهنجي پاليسين لاءِ جوابده بڻائڻ لاءِ سمورا قانوني ۽ معاشي طريقا استعمال ڪندو رهندو.
ٻئي طرف ايران طرفان انهن تازين پابندين تي فوري طور تي ڪو به سرڪاري ردعمل نه آيو آهي. جڏهن ته ماضي ۾ تهران آمريڪي پابندين کي غير قانوني قرار ڏيندو رهيو آهي ۽ ان جي باوجود تيل جي برآمدات جاري رکڻ جي دعويٰ ڪندو رهيو آهي.
تجزيه نگارن موجب نيون پابنديون اهڙي وقت ۾ لڳايون ويون آهن جڏهن آمريڪا ۽ ايران وچ ۾ ڇڪتاڻ جاري آهي ۽ عالمي توانائي مارڪيٽ به غير يقيني واري صورتحال کي منهن ڏئي رهي آهي.
