اسلام آباد:
ڪمپيٽيشن ڪميشن آف پاڪستان (سي سي پي) فرانسيسي ڪمپني بيورو ويريٽاس جي ٽريڊ مارڪ ۽ لوگو جي جعلسازي ۽ جعلي مارڪيٽنگ جي الزام ۾ MCI بيورو آف انسپيڪشن اينڊ سرٽيفڪيشن پاڪستان تي 50 لک رپيا ڏنڊ لاڳو ڪري ڇڏيو آهي.
سي سي پي موجب، ايم سي آءِ بيورو بيورو ويريٽاس جي ٽريڊ مارڪ ۽ لوگو جي نمايان خصوصيتن کي نقل ڪري صارفين کي گمراهه ڪيو.
ڪميشن ڪمپني کي پڻ حڪم ڏنو آهي ته فوري طور تي شڪايت ڪندڙ جي ٽريڊ مارڪ جو استعمال بند ڪيو وڃي.
سي سي پي پنهنجي فيصلي ۾ چيو ته بيورو ويريٽاس نالي هڪ فرانسيسي ادارو آهي، جيڪو 1828ع ۾ قائم ٿيو هو، 1999ع کان پاڪستان ۾ ٽيسٽنگ، انسپيڪشن ۽ سرٽيفڪيشن جون خدمتون فراهم ڪري رهيو آهي، جڏهن ته ايم سي آءِ بيورو گهربل تصديق کانسواءِ سرٽيفڪيشن جون خدمتون فراهم ڪندو رهيو.
ڪميشن موجب ايم سي آءِ بيورو جي ”انسپيڪٽ ايشورنس“ جي حوالي سان به گهربل قابليت ۽ تصديق جا قابل اعتماد ثبوت پيش نه ٿي سگهيا آهن.
سي سي پي ڪمپني کي 60 ڏينهن اندر عملدرآمد رپورٽ پيش ڪرڻ جي هدايت ڪندي خبردار ڪيو آهي ته جيڪڏهن حڪم تي عمل نه ڪيو ويو ته وڌيڪ قانوني ڪارروائي ڪئي ويندي.
پنهنجي فيصلي ۾، ڪميشن چيو ته اهو نه رڳو ٽريڊ مارڪ جي نقل جو معاملو آهي پر صارفين ۽ ڪاروباري اعتماد جي تحفظ جو پڻ. دنيا جي مشهور ادارن جي ساک جو ناجائز فائدو وٺڻ جي اجازت نه ٿي ڏئي سگهجي.
