لاهور: پنجاب ۾ ريلوي ٽرانسپورٽ جو نئون دور شروع ٿي ويو آهي، پنجاب حڪومت ۽ پاڪستان ريلوي وچ ۾ تاريخي معاهدو طئي ٿي ويو، جڏهن ته پنجاب جي وڏي وزير مريم نواز شريف ۽ ريلوي واري وزير حنيف عباسي ايم او يو تي صحيحون ڪيون.
ان منصوبي تحت پاڪستان جي پهرين فاسٽ ٽرين لاهور کان راولپنڊي هلائي ويندي جيڪا ٻن ڪلاڪن کان به گهٽ وقت ۾ 280 ڪلوميٽر جو فاصلو طئي ڪندي، جڏهن ته پنجاب جي 20 علائقن ۾ 8 لوڪل رستن تي 1415 ڪلوميٽرن جو ڪل نيٽ ورڪ قائم ڪيو ويندو ۽ جديد ٽرينون هلايون وينديون.
پنجاب حڪومت علائقائي رستن تي جديد ڊي ايم يو ٽرينون فراهم ڪندي، منصوبي ۾ شاهدره کان نارووال، نارووال کان سيالڪوٽ، رائيونڊ، قصور، پاڪپتن کان لوڌران، شيخوپوره، جڙانوالا، شوڪت، لالا موسيٰ، ملڪوال، سرگوڌا، فيصل آباد ۽ ڪوٽ ادو خان تائين بين الصوبائي روٽ شامل آهن.
منصوبي تحت نيون ريلوي انجڻيون ۽ جديد ڪوچون پڻ متعارف ڪرايون وينديون، جڏهن ته ريلوي اسٽيشنن جي خوبصورتي، عالمي معيار جي پارڪنگ، ريلوي حادثن کي منهن ڏيڻ لاءِ خودڪار نظام ۽ ٽريڪن تي گرين پارڪ ۽ ٻوٽا پڻ لڳايا ويندا.
ريلوي واري وفاقي وزير حنيف عباسي منصوبي جي شروعات تي وڏي وزير مريم نواز شريف کي خراج عقيدت پيش ڪندي چيو ته پنجاب حڪومت جي سهڪار سان 9 روڊن تي اٽڪل 9 ڪروڙ ماڻهو فائدو حاصل ڪندا ۽ پنجاب جي عوام کي يورپي معيار مطابق سفري سهولتون فراهم ڪيون وينديون.
هن چيو ته وڏي وزير مريم نواز شريف هن منصوبي جي اڳواڻي ۽ نگراني ڪندي، سندس قيادت ۾ صحت، تعليم، آءِ ٽي سميت مختلف شعبن ۾ انقلابي قدم کنيا ويا آهن، ريلوي ٽرانسپورٽ جي شعبي کي به بهتر بڻايو پيو وڃي.
حنيف عباسي چيو ته لاهور کان راولپنڊي جو سفر ٻن ڪلاڪن کان به گهٽ وقت ۾ مڪمل ڪيو ويندو، جڏهن ته ريلوي ٽريڪ جي چوڌاري چار لک کان وڌيڪ وڻ پوکيا ويندا ۽ شاهددرا کان رائيونڊ تائين گرين پارڪ ٺاهيا ويندا.
