– اشتهار –
ايراني پرڏيهي وزير عباس عراقچي احتجاج ڪندڙن کي ڦاهي ڏيڻ واري خبر کي رد ڪري ڇڏيو آهي. آمريڪي نشرياتي اداري فاڪس نيوز کي ڏنل انٽرويو ۾ ايراني پرڏيهي وزير چيو ته ايران ۾ ماڻهن کي ڦاهي جي سزا ڏيڻ جو ڪو به منصوبو ناهي، ماڻهن کي ڦاهي جي سزا ڏيڻ جو سوال ئي پيدا نٿو ٿئي. عباس عراقچي وڌيڪ چيو ته ايران ۾ معاشي مسئلن جي خلاف پرامن احتجاج ڏهن ڏينهن تائين جاري رهيو، جنهن کانپوءِ ٽن ڏينهن تائين تشدد جاري رهيو، جنهن جو انتظام اسرائيل ڪيو هو. ايراني پرڏيهي وزير دعويٰ ڪئي ته احتجاج ۾ ملوث عنصرن کي ٻاهرين ملڪ ڪنٽرول ڪري رهيا آهن، ڪجهه مظاهرين پوليس اهلڪارن تي فائرنگ ڪئي، داعش جي طرز جي دهشتگرد ڪارروايون ڪيون ويون، پوليس اهلڪارن کي جيئرو ساڙيو ويو. پرڏيهي وزير عباس عراقچي دعويٰ ڪئي آهي ته صورتحال هاڻي ڪنٽرول ۾ آهي ۽ ملڪ ۾ امن بحال ٿي چڪو آهي، هو يقين سان چئي سگهي ٿو ته موت جي سزا لاڳو ڪرڻ جو ڪو به منصوبو ناهي.
