اسلام آباد:
وچ اوڀر جي صورتحال هڪ اهم مرحلي ۽ نئين امتحان ۾ داخل ٿي چڪي آهي، ايران ۽ آمريڪا وچ ۾ جاري ڇڪتاڻ، جنگبندي ۽ سفارتي رابطن جو تسلسل اهڙي موڙ تي پهچي ويو آهي، جتي پاڪستان جي متحرڪ سفارتڪاري نمايان ڪردار ادا ڪندي نظر اچي رهي آهي.
سفارتي ذريعن موجب ايران ۽ آمريڪا وچ ۾ اڻ سڌي طرح ڳالهين ۾ فوري ۽ مڪمل اڳڀرائي نه ٿي آهي پر ڇڪتاڻ گهٽائڻ ۽ جنگبندي برقرار رکڻ تي اصولي اتفاق ٿي ويو آهي.
سيد عباس عراقچي واضح ڪيو ته ايران جنگ جي مستقل خاتمي لاءِ قابل عمل فريم ورڪ پيش ڪيو آهي پر ان جي ڪاميابي جو دارومدار ان تي آهي ته آمريڪا سنجيده عملي قدم کڻي ٿو يا نه.
پاڪستان سڄي عمل ۾ اهم ثالثي جو ڪردار ادا ڪيو، اعليٰ سطحي رابطا ۽ جنگ بندي کي وڌائڻ لاءِ مسلسل سفارتي ڪوششون ڪيون، جنهن کي سفارتي ڪاميابي قرار ڏنو پيو وڃي.
ذريعن موجب اسلام آباد ٻنهي ڌرين وچ ۾ اعتماد سازي ۾ اهم ڪردار ادا ڪيو ۽ ڳالهين لاءِ رستو هموار ڪيو. ايراني پرڏيهي وزير جي پاڪستان جي تازي دوري کي انتهائي اهم قرار ڏنو پيو وڃي، جنهن دوران خطي ۾ ڇڪتاڻ گهٽائڻ تي تفصيلي مشاورت ڪئي وئي.
هوڏانهن آمريڪي وفد جو پاڪستان جو متوقع دورو ملتوي ڪيو ويو آهي، جنهن کي سفارتي حلقن ۾ غير معمولي پيش رفت قرار ڏنو پيو وڃي. صدر ٽرمپ هاڻي ڇا ڪندو؟ اها صورتحال ڊونلڊ ٽرمپ لاءِ هڪ وڏو سفارتي چئلينج بڻجي وئي آهي. مستقل امن جو دارومدار ايران ۽ آمريڪا جي مستقبل جي عملن تي هوندو.
