صحت واري وفاقي وزير مصطفيٰ ڪمال چيو آهي ته ملڪ ۾ ايڇ آءِ وي جي رجسٽرڊ ڪيسن جو انگ 84 هزار آهي، جن مان 61 هزار ماڻهو علاج هيٺ آهن، جڏهن ته ٻين مريضن جو پتو ناهي پئجي سگهيو، جڏهن ته 65 ملين ڊالرن جي ايڇ آءِ وي پروگرام مان 61.1 ملين ڊالر گڏيل قومن ۽ اين جي اوز کي جاري ڪيا ويا. صحت واري وفاقي وزير مصطفيٰ ڪمال پريس ڪانفرنس ڪندي ايڇ آءِ وي ڪيسن بابت فنڊز جي استعمال بابت لاعلمي جو اظهار ڪندي چيو ته اين جي اوز پاران فنڊز جي استعمال جا تفصيل فراهم نه ڪيا پيا وڃن ۽ وزارت ان حوالي سان معلومات ڏيڻ کان انڪار ڪري رهي آهي، جيڪا ڳڻتي جوڳي ڳالهه آهي. هن چيو ته ايڇ آءِ وي ڪيسن جي گراف ۾ اوچتو ڪو به اضافو ناهي ٿيو پر اهو مستحڪم آهي ۽ هن وقت ملڪ ۾ رجسٽرڊ ڪيسن جو انگ 84 هزار آهي، جن مان 61 هزار ماڻهو علاج هيٺ آهن ۽ 23 هزار مريضن جو علاج نه ٿيڻ سبب پتو نه پيو آهي. صحت واري وفاقي وزير چيو ته اهو چوڻ غلط آهي ته ايڇ آءِ وي لاعلاج آهي ڇو ته هاڻ ايڇ آءِ وي قابل علاج آهي ۽ ان جون دوائون سرڪاري مرڪزن تي مفت دستياب آهن. مصطفيٰ ڪمال چيو ته پاڪستان ۾ 3 لک 69 هزار ڪيس ٿيڻ گهرجن ها پر موجوده شرح 0.1 سيڪڙو آهي جيڪا عالمي شرح 0.5 سيڪڙو کان گهٽ آهي. هن چيو ته تونسه ۾ ايڇ آءِ وي ڪيس جي رپورٽ 2024ع جي آهي ۽ جنوري کان اپريل 2026ع تائين ڪو به نئون ڪيس سامهون ناهي آيو، اسلام آباد ۾ 618 ڪيس رجسٽرڊ ٿيا آهن، جن مان 208 مقامي ۽ 408 ڪيس راولپنڊي، خيبرپختونخواهه، گلگت بلتستان ۽ آزاد ڪشمير سميت ٻين علائقن مان سامهون آيا آهن. صحت واري وفاقي وزير چيو آهي ته ملڪ ۾ 10 سي سي سرنج تي پابندي لڳائي رهيا آهيون، هڪ ڀيرو سرنج استعمال ٿي ته ٻيهر استعمال نه ڪئي ويندي.
Source link
Leave a Comment Leave a Comment
