بنگلاديش ۾ هڪ حيران ڪندڙ ۽ دل ڏکوئيندڙ واقعو پيش آيو آهي جتي هڪ پيءُ پنهنجي جان خطري ۾ وجهي پنهنجي ننڍڙن ٻارڙي جي زندگي بچائي ورتي. واقعو ڀيرب ريلوي جنڪشن تي پيش آيو، جنهن جي وڊيو سوشل ميڊيا تي وائرل ٿي رهي آهي.
ميڊيا رپورٽن موجب واقعو 28 اپريل جي منجهند ان وقت پيش آيو، جڏهن ڍاڪا ويندڙ مسافر ٽرين پليٽ فارم نمبر هڪ ۾ داخل ٿي رهي هئي. هڪ مڙس ۽ زال پنهنجي ٻار سان گڏ ٽرين تي چڙهڻ لاءِ اسٽيشن تي هئا.
اکين ڏٺن شاهدن موجب ٽرين ۾ چڙهڻ دوران عورت جو پير سلپ ٿي ويو ۽ هوءَ ٻار سميت پليٽ فارم تي ڪري پئي. ساڳئي وقت، ٻار هن جي هٿ مان ڦٽي ويو ۽ پليٽ فارم ۽ ٽرين جي وچ ۾ خطرناڪ خال ۾ ڪري پيو، جڏهن ته ٽرين اڳ ۾ ئي هلڻ شروع ڪيو.
ان نازڪ موڙ تي ٻار جو پيءُ بغير ڪنهن دير جي ٽريڪ تي ٽپو ڏئي ٻار کي کنيو ۽ پاڻ کي مضبوطيءَ سان پڪڙي زمين تي ڪري ڇڏيو. ٽرين جون ڪيتريون ئي ڪوچون انهن جي بلڪل ويجهو کان گذريون، پر پيءُ ۽ ٻار بلڪل بيٺا رهيا.
خوشقسمتيءَ سان ٻئي معجزاڻي طور بچي ويا ۽ ٽرين جي گذرڻ کان پوءِ پيءُ پنهنجي ٻار سان گڏ بيٺو هو، جڏهن ته ماءُ روئيندي هن وٽ پهتي.
واقعي جي وڊيو ۾ ڏسي سگهجي ٿو ته آس پاس جا ماڻهو خوف ۽ عجب ۾ رڙيون ڪري دعا گهري رهيا هئا. اطلاع ملڻ تي ريلوي پوليس واقعي واري هنڌ پهچي علائقي واسين جي مدد سان پيءُ ۽ ٻارڙي کي محفوظ هنڌ منتقل ڪيو.
