ايران جي ايٽمي پروگرام تي اعليٰ ٽيڪنيڪل ڳالهين ۾ مهينا لڳي سگهن ٿا: آمريڪي پرڏيهي وزير

آمريڪي پرڏيهي وزير مارڪو روبيو چيو آهي ته ايران جي ايٽمي پروگرام تي ڳالهيون انتهائي ٽيڪنيڪل آهن ۽ ان ۾ ڪيترائي مهينا لڳي سگهن ٿا، جڏهن ته آمريڪا آبنائي هرمز جي بحالي جي صورت ۾ پابندين ۾ نرمي جي ڪا آڇ ناهي ڪئي. مارڪو روبيو آمريڪي سينيٽ جي پرڏيهي لاڳاپن واري ڪميٽي کي ٻڌايو ته ايران لاءِ ٻيو قدم اهو آهي ته هو جبلن ۾ محفوظ ڪيل انتهائي افزوده يورينيم جي ذخيرن جي مستقبل جي نيڪال تي تفصيلي ۽ واضح ڳالهين لاءِ تيار هجي. ايران جي حوالي سان هن چيو ته انهن کي پنهنجي ملڪ ۾ افزودگي جي سرگرمين کي ڊگهي مدت تائين محدود ڪرڻ يا بند ڪرڻ جي حوالي سان ڳالهين تي اتفاق ڪرڻو پوندو. مارڪو روبيو چيو ته هي تمام ٽيڪنيڪل مسئلا آهن ان ڪري مان نه ٿو سمجهان ته اهي 5 ڏينهن ۾ حل ڪري سگهندا، ان لاءِ ماهرن جي هڪ ٽيم جي ضرورت پوندي جيڪا 30، 60 يا 90 ڏينهن جي عرصي ۾ ڪم ڪندي ۽ تفصيل سان گڏ ايندي پر انهن کي اهو ڪرڻ لاءِ سنجيده ٿيڻو پوندو. هن اشارو ڏنو ته تهران پنهنجي ايٽمي پروگرام جي پهلوئن تي ڳالهين لاءِ راضي ٿي ويو آهي پر تفصيل فراهم نه ڪيو ته اهي ڪهڙا مسئلا هئا ۽ واضح ڪيو ته ڳالهيون ان ڳالهه جي گارنٽي نه آهن ته اهي آخرڪار سينيٽ يا آمريڪي عوام جي لاءِ قابل قبول معاهدي تائين پهچندا. هن چيو ته ايران کي گهرجي ته هو سڀ کان پهريان آبنائي هرمز جي بحاليءَ جو اعلان ڪري، بغير ڪنهن اوزار جي بارودي سرنگون هٽائي ۽ جهازن تي فائر نه ڪري. مارڪو روبيو جو چوڻ هو ته آمريڪا ايران کي آبنائے هرمز جي بحاليءَ تي پابنديون هٽائڻ جي آڇ نه ڪئي آهي ۽ پابنديون هٽائڻ مشروط هوندو. ايران جو سپريم ليڊر زنده آهي ۽ شرڪت ڪري رهيو آهي، روبيو آمريڪي پرڏيهي وزير سينيٽ ڪميٽي کي ٻڌايو ته منهنجو خيال آهي ته ايران جو نئون سپريم ليڊر آيت الله مجتبيٰ خامنه اي زنده آهي ۽ وڌيڪ شرڪت ڪري رهيو آهي ۽ ان جا نشان موجود آهن. واضح رهي ته ايران جو سپريم ليڊر مجتبيٰ خامنه اي نئون عهدو سنڀالڻ کان پوءِ عوام ۾ نظر نه آيو آهي پر هو ايراني عملدارن کي هدايتون ڏيندو رهندو آهي ۽ اهو به ٻڌايو ويو هو ته ايراني اعليٰ اختيارين ساڻس ملاقات ۽ صلاح مشورا ڪيا آهن. آمريڪي ميڊيا دعويٰ ڪئي آهي ته حملي ۾ مجتبيٰ خامنه اي زخمي ٿي پيو، جڏهن ته هڪ رپورٽ ۾ چيو ويو آهي ته آمريڪي انٽيليجنس تجزيي مان معلوم ٿيو آهي ته مجتبي خامنه اي اعليٰ ايراني اهلڪارن سان گڏجي جنگي حڪمت عملي ۾ اهم ڪردار ادا ڪري رهيو آهي.



Source link