ڪراچي:
اسٽيٽ بئنڪ آف پاڪستان (ايس بي پي) پاران سود جي شرح ۾ 100 بيس پوائنٽس جي غير متوقع واڌ سان مالي مارڪيٽن ۽ صنعتي شعبي ۾ غير يقيني واري صورتحال پيدا ٿي وئي آهي.
بظاهر اهو فيصلو وڌندڙ مهانگائي، عالمي غير يقيني صورتحال ۽ توانائيءَ جي بلند قيمتن جي تناظر ۾ ڪيو ويو آهي، ماهرن موجب ان قدم جا حقيقي اشارا اڃا واضح ناهن.
مرڪزي بئنڪ موجب ايندڙ مهينن ۾ مهانگائي هدف کان وڌيڪ رهي سگهي ٿي، جنهن کي نظر ۾ رکندي سخت مانيٽري پاليسي اختيار ڪرڻ ضروري هئي، پر پاڪستان جهڙي معاشي ڍانچي ۾ اهڙي وڏي واڌ کي رڳو ٽيڪنيڪل قدم نه سمجهيو وڃي ٿو، بلڪه ان کي ممڪن خطرن جي اڳواٽ خبرداري طور ورتو وڃي ٿو. حڪومت جي مالياتي پاليسي ۽ مرڪزي بئنڪ جي عملن ۾ به تضاد سامهون آيا آهن.
سود جي شرح ۾ واڌ کان فوري پوءِ ناڻي واري وزارت پاڪستان انويسٽمينٽ بانڊز ۽ اجارا سکڪ جي نيلامين جي سمورن بولن کي رد ڪري ڇڏيو، جنهن سان اهو تاثر ڏنو ويو ته حڪومت اعليٰ شرح سود تي قرض وٺڻ کان انڪار ڪري رهي آهي.
ماهرن جو چوڻ آهي ته اعليٰ سود جي شرح حڪومتي قرضن جي قيمت ۾ وڏي پئماني تي اضافو ڪندي، جيڪو اڳ ۾ ئي بجيٽ جو وڏو حصو کائي رهيو آهي، جيڪو ترقياتي خرچن ۽ سست معاشي ترقي کي متاثر ڪري سگهي ٿو.
ٻئي طرف صنعتي حلقن خدشو ظاهر ڪيو آهي ته مهانگو قرض ڪاروباري سرگرمين کي وڌيڪ محدود ڪري ڇڏيندو، خاص ڪري ننڍا ۽ وچولي ڪاروبار سخت متاثر ٿيندا، ڪيتريون ئي صنعتون اڳ ئي مهانگائي ۽ گهٽ طلب سبب دٻاءُ جو شڪار آهن.
ماهرن جو اهو به چوڻ آهي ته پاڪستان ۾ مهانگائي جا بنيادي سبب سپلائي طرف آهن، جهڙوڪ توانائيءَ جون قيمتون ۽ مٽا سٽا جي شرح، جن تي صرف سود جي شرح وڌائڻ سان ڪنٽرول ڪرڻ مشڪل آهي.
تجزيه نگارن موجب واضح ۽ مربوط پاليسي جي غير موجودگي ۾ اهي قدم معيشت ۾ استحڪام بدران وڌيڪ خوف پيدا ڪري سگهن ٿا.
