آمريڪا ۽ ايران جي وچ ۾ هڪ وڏي تجويز ڪيل ڊيل جا تفصيل سامهون آيا آهن، جيڪو 60 ڏينهن جي جنگبندي ۾ واڌ ڪري سگهي ٿو، آبنائے هرمز ۾ سامونڊي واپار بحال ڪري سگهي ٿو ۽ ايران کي عالمي مارڪيٽ ۾ آزاديءَ سان تيل وڪڻڻ جي اجازت ڏئي سگهي ٿو.
آمريڪي خبرن جي ايجنسي ايگزيڪيوٽو جي رپورٽ موجب ٻئي ملڪ مفاهمت جي ياداشت (ايم او يو) تي صحيحن جي ويجهو آهن، جيڪو شروعاتي طور تي 60 ڏينهن تائين هلندو ۽ گڏيل رضامندي سان ان ۾ واڌ ٿي سگهي ٿي.
رپورٽ موجب تجويز ڪيل معاهدي دوران ايران آبنائے هرمز کي ڪنهن به ٽول ٽيڪس کانسواءِ بين الاقوامي شپنگ لاءِ کليل رکندو. ان کان علاوه ايران آبنائے هرمز ۾ رکيل بارودي سرنگون هٽائڻ تي به اتفاق ڪيو آهي ته جيئن واپاري جهازن جي آزاد آمد رفت بحال ٿي سگهي.
ذريعن موجب ان دوران ايران جي ايٽمي پروگرام کي محدود ڪرڻ بابت ڳالهيون به جاري رهنديون. آمريڪي اهلڪارن جو چوڻ آهي ته ڊيل جي ضرورت هوندي ته ايران کي ضمانت ڏني وڃي ته هو ڪڏهن به ايٽمي هٿيارن جي ڳولا نه ڪندو، جڏهن ته يورينيم جي افزودگي تي حدن جي ڳالهين ۽ انتهائي افزوده يورينيم جي ذخيري کي ختم ڪرڻ.
رپورٽ ۾ چيو ويو آهي ته ان جي بدلي ۾ آمريڪا ايراني بندرگاهن تي ڪجهه پابنديون نرم ڪندو ۽ معاشي پابنديون به نرم ڪيون وينديون ته جيئن ايران عالمي مارڪيٽ ۾ آزاديءَ سان تيل وڪرو ڪري سگهي.
ماهرن موجب ان پيش رفت سان نه رڳو ايراني معيشت کي فائدو پهچندو پر ان سان عالمي تيل مارڪيٽ ۾ به استحڪام اچڻ جو امڪان آهي.
آمريڪي عملدارن موجب، معاهدي جو بنيادي اصول ‘ڪارڪردگي جي بدلي ۾ رليف’ هوندو، مطلب اهو آهي ته ايران جيترو تيزيءَ سان آبنائے هرمز ۾ شپنگ لين بحال ڪندو، اوتري تيزيءَ سان آمريڪا اقتصادي پابندين ۾ نرمي ڪندو.
پرڏيهي خابرو اداري موجب ايران پنهنجي روڪيل فنڊز جي فوري بحالي ۽ مستقل پابنديون هٽائڻ چاهي ٿو پر آمريڪا جو موقف آهي ته مڪمل رليف عملي قدمن کانپوءِ ئي ڏنو ويندو.
ذريعن جو چوڻ آهي ته تجويز ڪيل معاهدي ۾ حزب الله ۽ اسرائيل وچ ۾ جنگ ختم ڪرڻ جو نقطو به شامل ڪيو ويو آهي.
رپورٽ موجب پاڪستاني ڌر ان معاهدي ۾ اهم ثالثي جو ڪردار ادا ڪري رهي آهي جڏهن ته فيلڊ مارشل تهران ۾ مختلف سفارتي ملاقاتن ذريعي معاهدي کي حتمي شڪل ڏيڻ لاءِ ڪوششون ڪيون.
آمريڪي اختيارين جو چوڻ آهي ته باقي معاملا ايندڙ ڪجهه ڪلاڪن ۾ طئي ٿيڻ جو امڪان آهي ۽ معاهدي جو باضابطه اعلان آچر تي ٿي سگهي ٿو.
