سنڌ ۾ گرمي جي شدت ۾ سخت اضافو جو امڪان آهي، جڏهن ته پنجاب ۾ برسات جو سلسلو اڃا تائين موجود آهي.
موسميات کاتي موجب لاهور شهر ۾ گرمي جي شدت برقرار آهي، جڏهن ته صوبائي راڄڌاني سميت پنجاب ۾ مٽيءَ جي هوائن سان گڏ هلڪي برسات جو سلسلو پڻ جاري آهي.
موسميات ماهرن جو چوڻ آهي ته لاهور شهر ۾ منجهند ۽ شام جي وقت تيز هوائن سان گڏ هلڪي برسات جو امڪان آهي. هوڏانهن شهر ۾ گهٽ ۾ گهٽ گرمي پد 27 ڊگري سينٽي گريڊ جڏهن ته وڌ ۾ وڌ 40 ڊگري سينٽي گريڊ تائين پهچڻ جو امڪان آهي.
ٻئي طرف سنڌ ۾ گرمي جي لهر وڌڻ جو خدشو آهي ۽ صوبي جي اڪثر ضلعن ۾ پارو 50 ڊگري تائين پهچڻ جو امڪان آهي.
موسميات کاتي سنڌ ۾ گرمي جي لهر جو خدشو ظاهر ڪندي ٻڌايو آهي ته ايندڙ هفتي (25 کان 31 مئي) تائين گرمي پد 6 ڊگري تائين وڌڻ جو امڪان آهي.
موسميات جي ماهرن جو چوڻ آهي ته اندرون سنڌ جي اڪثر علائقن ۾ پارو 50 ڊگري تائين پهچي سگهي ٿو. ان سلسلي ۾ شهرين، هارين ۽ بزرگ شهرين کي هدايت ڪئي وئي آهي ته هو غير ضروري سج ۾ ٻاهر نڪرڻ کان پاسو ڪن.
