ڪراچي:
سنڌ حڪومت عورتن لاءِ وڌيڪ 1000 گلابي اي وي اسڪوٽز خريد ڪرڻ جو فيصلو ڪيو آهي.
سينيئر صوبائي وزير شرجيل انعام ميمڻ چيو آهي ته صوبي ۾ ماس ٽرانزٽ سسٽم کي وڌيڪ وسيع ڪرڻ لاءِ انٽر سٽي پيپل بس سروس شروع ڪرڻ جو فيصلو ڪيو ويو آهي. لاڙڪاڻو، دادو، سيوهڻ، حيدرآباد، سانگهڙ سميت مختلف ضلعن ۾ تمام جلد انٽر سٽي بس سروس شروع ڪئي ويندي.
اطلاعات، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ چيو آهي ته ڪراچي لاءِ نيون اي وي بسون ۽ ڊبل ڊيڪر بسون به شروع ڪيون ويون آهن. ان کان علاوه خيرپور کان روهڙي ۽ خيرپور کان راڻيپور تائين نوان رستا ايندڙ هفتي شروع ڪيا ويندا.
شرجيل انعام ميمڻ جي صدارت هيٺ ٽرانسپورٽ اينڊ ماس ٽرانزٽ کاتي جو اجلاس ٿيو، جنهن ۾ سيڪريٽري ٽرانسپورٽ اسد زمان، ايم ڊي سنڌ ماس ٽرانزٽ اٿارٽي سليم الله اوڍو ۽ ٻين لاڳاپيل عملدارن شرڪت ڪئي.
ملاقات ۾ پيپلز بس سروس جي نون رستن، گلابي اي وي اسڪوٽرن جي ورڇ، اي وي ٽيڪسي سروس ۽ ماس ٽرانزٽ جي جاري ۽ تجويز ڪيل منصوبن تي تفصيلي غور ويچار ڪيو ويو.
اجلاس ۾ شهرين کي سفري سهولتن ۾ وڌيڪ بهتري لاءِ ايندڙ ڪجهه مهينن ۾ وڌيڪ نيون بسون ڪراچي پهچائڻ جو اعلان ڪيو ويو. سينيئر وزير پڻ هدايت ڪئي ته گلابي اي وي اسڪوٽرن جي رجسٽريشن بابت مسئلن جي فوري حل کي يقيني بڻايو وڃي.
شرجيل انعام ميمڻ چيو ته سنڌ حڪومت عورتن کي بااختيار بڻائڻ ۽ کين محفوظ ۽ باوقار سفري سهولتون فراهم ڪرڻ لاءِ عملي قدم کڻي رهي آهي. اجلاس ۾ ماس ٽرانزٽ سسٽم کي جديد خطوط تي استوار ڪرڻ لاءِ وڌيڪ ڊبل ڊيڪر ۽ هائبرڊ بسون هلائڻ تي به اتفاق ڪيو ويو.
اجلاس ۾ وڌيڪ ٻڌايو ويو ته ڪراچي سميت سڄي سنڌ ۾ ٽرانسپورٽ نظام کي قدم قدم تي جديد ڪيو پيو وڃي. عورتن، شاگردن ۽ روزاني مسافرن جي سهولت حڪومت جي اولين ترجيح آهي.
شرجيل ميمڻ چيو ته اي وي بسون، هائبرڊ ٽرانسپورٽ ۽ گلابي اسڪوٽر نه رڳو ماحول دوست آهن پر شهرين لاءِ معاشي طور به فائديمند ثابت ٿيندا. هن هدايت ڪئي ته هلندڙ منصوبن جي رفتار کي تيز ڪيو وڃي ته جيئن ماڻهو جلد کان جلد انهن سهولتن مان فائدو حاصل ڪري سگهن.
