اسلام آباد:
اسلام آباد هاءِ ڪورٽ مان بدلي ڪيل جسٽس محسن اختر ڪياني ۽ جسٽس بابر ستار جي سمورن اسٽاف کي سومر تي واپس گهرايو ويو.
ذريعن موجب اسلام آباد هاءِ ڪورٽ پاران اسلام آباد ۾ گهرن ۾ مقرر عملي ۽ گاڏيون فراهم ڪيون ويون. ملئي، خانسام، ڪڪ ۽ ڊرائيورن کي سومر تي ججن جي گهرن مان واپس گهرايو ويو آهي. ٻئي جج سومر ڏينهن پشاور ۽ لاهور هاءِ ڪورٽ ۾ حاضر ٿيا هئا.
ذريعن جو وڌيڪ چوڻ آهي ته اسلام آباد هاءِ ڪورٽ طرفان خاندان يا ٻارن جي استعمال لاءِ هڪ هڪ گاڏي به واپس ورتي وئي آهي.
اسلام آباد هاءِ ڪورٽ جي رجسٽرار آفيس جو چوڻ آهي ته قانون ۽ ضابطي موجب ججن جي گهرن مان عملي کي واپس گهرايو ويو آهي. رجسٽرار آفيس موجب ججن کي ٻين هاءِ ڪورٽن ۾ منتقل ڪيو ويو آهي ۽ اتي ئي کين اهي سموريون سهولتون فراهم ڪيون وينديون. ذريعن موجب ٻنهي ججن جي گهرن ٻاهران سڪيورٽي گارڊ اڃا تائين موجود آهن ۽ کين واپس نه ورتو ويو آهي.
ٻئي طرف جسٽس ثمن رفعت امتياز اڳ ۾ ئي پنهنجو سمورو اسٽاف ۽ گاڏي واپس ڪري سنڌ هاءِ ڪورٽ ۾ داخل ٿي ويو آهي.
