سڄي ملڪ ۾ گهريلو انٽرنيٽ ڪنيڪشن جو تعداد 5.10 ملين تائين وڌي ويو.
وزيراعظم محمد شهباز شريف جي صدارت هيٺ انفارميشن ٽيڪنالاجي ۽ ٽيلي ڪام واري وزارت جي معاملن جو جائزو ورتو ويو. اجلاس کي خطاب ڪندي وزيراعظم چيو ته ملڪ ۾ آءِ ٽي شعبي جو فروغ ۽ برآمدات ۾ اضافو حڪومت جي اولين ترجيحن ۾ شامل آهي.
هن چيو ته پاڪستان جي نوجوانن وٽ آءِ ٽي ۾ وڏي صلاحيت آهي، جنهن مان ڀرپور فائدو وٺڻ گهرجي. وزيراعظم گلگت بلتستان ۽ آزاد ڄمون ۽ ڪشمير ۾ آسان سروس سينٽرز جي قيام جي حوالي سان ڪم تيز ڪرڻ جي به هدايت ڪئي.
شهباز شريف صوبائي حڪومتن سان گڏجي ڪم ڪرڻ جي هدايت ڪئي ته جيئن صوبن ۾ به آسان سهولتون شروع ڪيون وڃن. آئي ٽي سيڪٽر ۾ شهري ۽ ٻهراڙي وارن علائقن جي وچ ۾ فرق کي گهٽائڻ لاءِ صوبائي، ضلعي سطح جي حڪومتن جي مدد وٺڻ گهرجي.
ان موقعي تي وزيراعظم کي ڏنل بريفنگ ۾ ٻڌايو ويو ته ملڪ ۾ گهريلو انٽرنيٽ ڪنيڪشنز جو انگ 2024ع ۾ 1.9 ملين مان وڌي 2026ع ۾ 5.10 ملين ٿي ويو آهي، هلندڙ مالي سال پاڪستان مان 4.5 کان 4.6 ارب آمريڪي ڊالرن جي آئي ٽي برآمدات جو امڪان آهي.
بريفنگ ۾ ٻڌايو ويو ته پاڪستان تازو ئي 5G سروسز جي نيلامي منعقد ڪئي جيڪا 2016ع کان پوءِ دنيا جي سڀ کان وڏي نيلامي هئي، ان نيلامي مان پاڪستان کي 509 ملين آمريڪي ڊالرن جي آمدني ٿي.
اجلاس ۾ شرڪت ڪندڙن کي ٻڌايو ويو ته انڊس اي ويڪ فيبروري 2026ع ۾ آرٽيفيشل انٽيليجنس جي فروغ جي حوالي سان 30 شهرن ۾ تقريبون منعقد ڪيون ويون. انڊس اي ويڪ ۾ 100 کان وڌيڪ عالمي وفدن شرڪت ڪئي. ان حوالي سان 88 پولنگ ڪيا ويا.
بريفنگ موجب اسلام آباد ۾ سرڪاري اسڪولن ۽ هيلٿ يونٽن کي فائبر ڪنيڪشن فراهم ڪيو ويو آهي. اسلام آباد کي مفت انٽرنيٽ هاٽ اسپاٽ فراهم ڪرڻ جو ڪم آخري مرحلي ۾ آهي. سيدپور ماڊل ڳوٺ ۽ فاطمه جناح پارڪ ۾ اي لرننگ پوڊز لڳايا پيا وڃن.
اجلاس ۾ منصوبابندي واري وفاقي وزير احسن اقبال، قانون ۽ انصاف واري وفاقي وزير اعظم نذير تارڙ، اقتصادي معاملن واري وفاقي وزير احد خان چيما، انفارميشن ٽيڪنالاجي ۽ ٽيلي ڪام واري وفاقي وزير شازا فاطمه، ناڻي ۽ ريلوي واري مملڪتي وزير بلال اظهر ڪياني ۽ لاڳاپيل اعليٰ سرڪاري عملدارن شرڪت ڪئي.
