وزيراعظم شهباز شريف ٽوبه ٽيڪ سنگهه ۾ پنجاب اسيمبلي جي ميمبر ڪرنل (رٽائرڊ) ايوب گادي جي ڊيره تي فائرنگ جي واقعي تي گهري ڏک ۽ افسوس جو اظهار ڪيو آهي.
وزيراعظم آفيس طرفان جاري بيان موجب وزيراعظم شهباز شريف واقعي جي جاچ مڪمل ڪري جوابدارن کي انصاف جي ڪٽهڙي ۾ آڻڻ جي هدايت ڪئي آهي.
وزيراعظم چيو ته ايوب گادي مسلم ليگ جي محنتي ڪارڪنن مان هڪ آهي، سندس ڪئمپ تي عوامي مسئلا ٻڌڻ دوران مٿس حملو انتهائي ڳڻتي جوڳو آهي.
وزيراعظم حادثي ۾ فوت ٿيندڙن جي لاءِ مغفرت ۽ سوگوار پونئرن لاءِ صبر جي دعا ڪئي، الله تعاليٰ حادثي ۾ زخمي ٿيندڙن کي جلد صحتيابي عطا فرمائي.
پنجاب جي ضلعي ٽوبه ٽيڪ سنگهه ۾ راجا ٿاڻي جي حد 184 گ ب ۾ مسلم ليگ (ن) جي صوبائي اسيمبلي ميمبر ڪرنل (ر) سردار ايوب خان گادي جي ڪئمپ تي هٿياربندن حملو ڪري انڌاڌنڌ فائرنگ ڪري ڏني، جنهن جي نتيجي ۾ 4 ڄڻا موقعي تي ئي مارجي ويا جڏهن ته ايم پي اي سميت 3 ڄڻا سخت زخمي ٿي پيا.
رپورٽ موجب حملي آورن ڪيمپ جو گهيرو ڪيو ۽ اوچتو فائرنگ شروع ڪري ڏني. فوتين ۾ ضيغم عباس، نديم، حق نواز ۽ خليق داد شامل آهن.
حادثي ۾ ميمبر صوبائي اسيمبلي ڪرنل (ر) سردار ايوب گادي، شهباز ۽ رياض سخت زخمي ٿي پيا، جن کي ڳڻتي جوڳي حالت ۾ ڊي ايڇ ڪيو اسپتال ٽوبه ٽيڪ سنگهه منتقل ڪيو ويو.
واقعي جو اطلاع ملندي ئي آر پي او سهيل اختر سکيرا ۽ ڊي پي او ٽوبا پوليس جي وڏي نفري سان واقعي واري هنڌ پهچي ويا، جڏهن ته پنجاب فرانزڪ سائنس ٽيمن شاهديون گڏ ڪرڻ شروع ڪري ڇڏيون آهن.
پوليس اختيارين موجب حملو دشمني جو نشانو لڳي رهيو آهي پر واقعي جي سمورن رخن کان جاچ جاري آهي.
جوابدارن جي گرفتاري لاءِ اسپيشل ٽيمون جوڙيون ويون آهن ۽ مختلف علائقن ۾ ڇاپا هنيا پيا وڃن.
آر پي او سهيل اختر سکيرا ڊي ايڇ ڪيو اسپتال پهچي زخمين جي عيادت ڪئي ۽ چيو ته جوابدارن کي هر صورت ۾ انجام تائين پهچايو ويندو ۽ وارثن سان انصاف ڪيو ويندو.
واقعي کانپوءِ علائقي ۾ سخت ڇڪتاڻ آهي، جڏهن ته ڪيمپ ۽ ان جي ڀرپاسي ۾ سڪيورٽي سخت ڪئي وئي آهي، جڏهن ته پنجاب جي وڏي وزير مريم نواز شريف اڳوڻي صوبائي وزير ايوب خان گاديءَ جي ڪئمپ تي حملي جي مذمت ڪئي آهي.
