بنون جي ميران پوليس ٿاڻي جي حد ۾ ڳجهي اطلاع تي ڪامياب آپريشن دوران دهشتگردن جا ناپاڪ ارادا ناڪام بڻائي ڇڏيا.
آپريشن صبح سوير شروع ڪيو ويو، جنهن ۾ پوليس ۽ سي ٽي ڊي جي گڏيل ٽيمن ڀرپور نموني شرڪت ڪئي. آپريشن جي سڌو سنئون نگراني ايس پي رورل بنون ڪئي، جڏهن ته ٻه ايس ڊي پي اوز ۽ ايس پي سي ٽي ڊي پڻ موقعي تي موجود هئا.
جديد ڊرون نگراني ۽ جديد ٽيڪنالاجي جو استعمال دهشتگرد عنصرن جي حرڪت ۽ امڪاني لڪيل هنڌن جي نگراني ڪرڻ لاءِ ڪيو ويو. آپريشن دوران پوليس ۽ دهشتگردن وچ ۾ فائرنگ جي ڏي وٺ ٿي ۽ علائقي کي مڪمل طور تي گھيري ورتو ويو.
فائرنگ جي ڏي وٺ ۾ 11 دهشتگرد مارجي ويا جڏهن ته ڪيترائي زخمي ٿي پيا. آپريشن دوران ميرانشاهه روڊ تي آزاد منڊي ويجهو 10 ڪلو گرام دستي بم به هٿ ڪيو ويو، جنهن کي بروقت ناڪاره بڻائي ڇڏيو.
شروعاتي اطلاعن موجب بارودي سرنگ اڄ روڊ اوپننگ ڊيوٽي کي نشانو بڻائڻ لاءِ نصب ڪيو ويو هو پر پوليس ۽ سي ٽي ڊي جي بروقت حڪمت عملي سان دهشتگردي جو وڏو منصوبو ناڪام بڻائي ڇڏيو.
آپريشن دوران هڪ پوليس اهلڪار شهيد ۽ ٻيو زخمي ٿي پيو. زخمي اهلڪار کي فوري طور تي علاج لاءِ اسپتال منتقل ڪيو ويو آهي.
انسپيڪٽر جنرل آف پوليس خيبرپختونخواهه ذوالفقار حميد ڪامياب آپريشن تي پوليس ۽ سي ٽي ڊي ٽيمن جي جرئت، بهادري ۽ پيشه ورانه صلاحيتن کي ساراهيو.
آءِ جي سنڌ ذوالفقار حميد چيو ته خيبرپختونخواهه پوليس دهشتگردن جي ناپاڪ ارادن کي هر محاذ تي ناڪام بڻائڻ جي ڀرپور صلاحيت رکي ٿي. بنو پوليس ۽ سي ٽي ڊي جي بهادر جوانن هڪ ڀيرو ٻيهر ثابت ڪري ڇڏيو آهي ته هو قوم جي تحفظ لاءِ هر قرباني ڏيڻ لاءِ تيار آهن.
هن چيو ته فتنا خوارج ۽ امن دشمن عنصرن خلاف آپريشن وڌيڪ شدت سان جاري رهندو. خيبرپختونخواهه پوليس عوام جي جان و مال جي حفاظت لاءِ فرنٽ لائين تي بيٺي آهي ۽ دشمن جي هر حملي جو منهن ٽوڙ جواب ڏنو ويندو.
آءِ جي پي آپريشن ۾ حصو وٺندڙ پوليس اهلڪارن ۽ آفيسرن لاءِ خصوصي انعامن جو پڻ اعلان ڪيو.
